NA SAME 39 - Vakavakadewa Makawa

Sa tukuni ni sa ka lekaleka walega na noda bula. Vua na Domo-ni-sere, vei Jitucuni. A Same i Tevita.

¹ Au a kaya, Ka'u na vakaraica na noqu i valavala Me'u kakua ni cala e na yamequ: Ka'u na tarova na gusuqu e nai tarovi, Ni ra sa tu e mataqu na tamata caka ca.

² Ka'u a galu ka tiko lo sara, ka'u a sega ni vosataka na ka vinaka; Ia ka sa tubu kina na noqu rarawa.

³ Sa katakata na yaloqu e lomaqu, Ni'u sa vakanananu sa waqa na buka. Ka'u sa qai vosa e na yamequ.

⁴ I Jiova, mo ni vakatakila vei au na noqu i otioti, Kei nai vakarau ni noqu gauna, se sa vakaevei; Me'u kila kina na noqu mate rawarawa.

⁵ Raica, ko ni sa lewa me sa vaka na raba ni liga na noqu gauna; Ia na noqu veiyabaki sa tauvata vei kemuni kei na ka sa sega: E dina, ni ra sa tiko vinaka sara na tamata era sa ka wale kecega. Sela.

⁶ E dina ni ra yaloyalo walega na tamata ni ra bula voli; E dina ni ra lomaocaoca e na ka walega: Sa daukumuna vata nai yau, ka sa sega ni kila, se ko cei ena taukena.

⁷ Ia oqo, kemuni na Turaga, a cava ka'u sa waraka tiko? Ka'u sa nuinui ga vei kemuni.

⁸ Ni vakabulai au mai na noqu i valavala ca kecega: Kakua ni laivi au me ra vakasewasewani au ko ira na lialia.

⁹ Au a galu, au a sega ni dalaga; Ni kemuni a vakayacora.

¹⁰ Ni kauta tani vei au na ligamuni: Au sa rusa ni sa yaviti au na ligamuni.

¹¹ Ni kemuni sa vakanakuitataka na tamata ka vunauca e na vuku ni nona caka ca, Ko ni sa vakaotia na nona lagilagi me vaka na ka sa kania na sarasara: E dina ga ni sa ka walega na tamata kecega. Sela.

¹² Mo ni rogoca na noqu masu, Jiova, ka vakatu daligamuni ki na noqu tagi; Mo ni kakua ni galu ni sa vakawai na mataqu: Ni'u sa vulagi ga vei kemuni, Ka kai tani, me vakataki ira kece na noqu qase.

¹³ Ni vosoti au mada vakalailai, me'u bula cake tale, Ni'u sa bera ni lako tani eke, me'u sega ni kune tale.