NA SAME 38 - Vakavakadewa Makawa

Sa vakatusa na nona ca na tamata sa kila dina na yalona. A Same i Tevita, me vakananuma kina na ka.

¹ I Jiova, kakua ni vunauci au e na nomuni cudru: Se cudruvi au e na nomuni cudru waqawaqa.

² Ni sa coba sara ki lomaqu na nomuni gasau, Ka sa bibi vei au na ligamuni.

³ Sa sega na tiki ni yagoqu sa bula e na vuku ni nomuni cudru; Sa sega ni vakacegu na suiqu e na vuku ni noqu i valavala ca.

⁴ Ni sa uasivia cake na uluqu na noqu caka ca: Me vaka nai colacola bibi ka'u sa sega ni colata rawa.

⁵ Sa bona ka vakanana na noqu vidikoso E na vuku ni noqu lialia.

⁶ Au sa rarawa sara; au sa vakalairoro vakalevu; Au sa tagi lako e na siga ka bogi mai.

⁷ Ni sa robota na toloqu na mate vakasisila: Ka sa sega na tiki ni yagoqu sa bula.

⁸ Au sa malumalumu ka musulaki sara: Au a vutugu ni sa daurarawa na yaloqu.

⁹ I Jiova, sa tu e matamuni na ka kecega ka'u sa gadreva; Ka sa sega ni vuni vei kemuni na noqu vutuqu.

¹⁰ Sa ceguoca na lomaqu, sa yali tani na noqu kaukauwa: Na rai ni mataqu talega, sa takali vei au.

¹¹ A noqu i tau kei na wekaqu era la'ki tu tani mai na noqu mate ca; Ia na kai noqu era sa tu vakayawa.

¹² A ra sa birika nai cori ko ira sa qarai au me'u mate. Ia ko ira talega era sa segata me'u ca era vosavakacacataki au, Ka ra vakananuma ki na ka lasu e na tiki ni siga kecega.

¹³ Ia koi au, ka'u sa vaka na didivara, ka'u sega ni rogoca; Ka vaka na galu sa sega ni dalaga.

¹⁴ Ia ka'u sa vaka e dua sa sega ni rogoca rawa, Ka sa sega e na gusuna na veivunauci.

¹⁵ Ni'u sa nuitaki kemuni ga, Jiova: O ni na rogoci au, na Turaga na noqu Kalou.

¹⁶ Ni'u sa kaya, De ra rekitaki au: Ia ni sa tidara na yavaqu, era sa vakalevulevui ira vei au.

¹⁷ Ni'u sa voleka ni tu vakadua, A sa tu vakadua e mataqu na noqu rarawa.

¹⁸ Ni'u na vakatusa na noqu i valavala ca; Ka'u na rarawa e na vuku ni noqu caka cala.

¹⁹ Ni ra sa tamata bula na noqu meca, ka ra sa kaukauwa: Ia ko ira era cati au ni sega na vuna era le vuqa mai.

²⁰ O ira talega era kitaka na ka ca mei sau ni ka vinaka Era noqu meca; ni ka'u sa muria na ka vinaka.

²¹ I Jiova, Kakua ni biuti au, Kemuni na noqu Kalou, kakua ni vakayawa vei au.

²² Mo ni kusarawa mo ni vukei au mai, Kemuni na Turaga na noqu i Vakabula.