NA SAME 37 - Vakavakadewa Makawa

A tamata caka dodonu ena vinaka ga; ena ca na tamata i valavala ca. A Same i Tevita.

¹ Kakua ni ko rarawa e na vukudra nai valavala ca, Se vuvutaki ira na daucaka ca.

² Ni ra na tamusuki kusarawa me vaka na co, Me vaka na co drokadroka era na malai yani.

³ Vakararavi vei Jiova, ka caka vinaka; O na qai tiko ga e na vanua, ka vakani e na ka vakaidina.

⁴ Ia mo rekitaki Jiova; Ena solia vei iko ko koya na ka sa gadreva na yalomu.

⁵ Laiva na nomu sala vei Jiova; Vakararavi talega vua, ka na vakayacora ko koya.

⁶ Ia ena vakaraitaka ko koya na nomu yalododonu me vaka na rarama, Kei na ka ko sa lewai kina me vaka na siga levu.

⁷ Vakarorogo vei Jiova, ka waraki koya tiko: Kakua ni vakararawataki iko e na vuku i koya sa tamata yaco tiko, E na vuku ni tamata sa vakayacora tiko na nonai naki ca.

⁸ Kakua so ni cudru, biuta ga na daulesavi; Kakua ni vakararawataki iko mo cala kina.

⁹ Ni na muduki tani na daucaka ca; Ia ko ira sa dauwaraki Jiova, era na taukena na vanua.

¹⁰ Malua mada vakalailai, ena qai takali na tamata ca; Io, ko na vakananuma na nona yasana, ia sa na yali kina ko koya.

¹¹ Ia ko ira na yalomalumalumu era na taukena na vanua; Ka na daumarau tiko e na veivakacegui vakaidina.

¹² A tamata ca sa dauvereta na tamata dodonu, Ka vakasequruquru vua.

¹³ Ena dredrevaki koya na Turaga: Ni sa raica sa toro mai na nona siga.

¹⁴ Era sa ucuna nai seleiwau na tamata ca, ka kaloca na nodra dakai titi, Me ra vakabalei ira na dravudravua kei na luveniyali, Ka me ra vakamatei ira nai valavala dodonu.

¹⁵ Ena suaka dina na yalodra na nodra i seleiwau, Ena musulaki talega na nodra dakai titi.

¹⁶ Sa yaga vakalevu na ka lailai sa nona na tamata dodonu, Ka yaga vakalailai nai yau sa nodra na tamata ca era le vuqa.

¹⁷ Ni na musulaki na taba ni tamata ca: Ia ko Jiova sa totaka na tamata dodonu.

¹⁸ Sa kila tiko ko Jiova na nodra siga na yalododonu: Ia na nodra i votavota ena sega ni oti rawa.

¹⁹ Era na sega ni madua e na gauna ca: Era na mamau e na gauna ni dausiga.

²⁰ Era na rusa na tamata ca, Ia ko ira na meca i Jiova era na vaka na uro ni lami: Era na vakaseavutaki; me vaka na kubou era na seavu yani.

²¹ Sa daukerekere na tamata ca, ka sa sega ni sauma tale: Ia na tamata dodonu sa yalololoma, ka daulomasoli.

²² Era na taukena na vanua ko ira sa vakalougatataki mai vua; Ia ko ira sa vakarusai mai vua ena muduki tani.

²³ Sa vakataudeitaka ko Jiova nai lakolako ni tamata vinaka: Ka sa rekitaka na nona sala ko koya.

²⁴ Kevaka sa bale, ena sega ni vakabalei vakadua; Ni sa tokoni koya cake ko Jiova e na ligana.

²⁵ Au a gone, ka'u sa qai qase mai; Ia ka'u a sega ni raica na yalododonu ni sa biu laivi, Se na nona kawa ni ra sa vosai kedra madrai.

²⁶ Sa yalololoma tiko ko koya, a sa dausoli tiko; Ka sa kalougata na nona kawa.

²⁷ Biuta laivi na ka ca, ka caka vinaka; Ka tiko dei ga ka sega ni mudu.

²⁸ Ni sa vinakata na ka dodonu ko Jiova, Ka sa sega ni biuti ira na nona tamata era yalosavasava; Era sa maroroi ka sega ni mudu: Ia na nodra kawa na tamata ca ena muduki tani.

²⁹ Era na taukena na vanua ko ira na yalododonu, Ka tiko kina ka sega ni mudu.

³⁰ Sa vosataka na vuku na gusuna na yalododonu, Ka sa vosataka na ka dodonu na yamena.

³¹ Sa tiko e lomana na vunau ni nona Kalou; Ena sega ni tidara e dua nai cavucavu ni yavana.

³² Sa dauyadravi koya na yalododonu na tamata ca, Ka sa dausegata me vakamatea.

³³ Ena sega ni biuti koya ki na ligana ko Jiova, Se vakacalai koya ni sa lewai.

³⁴ Waraki Jiova, ka muria na nona sala, Ena qai laveti iko cake mo taukena na vanua: Ni ra sa muduki tani na tamata ca. Ko na raica.

³⁵ Au a raica e dua na tamata ca ni sa kaukauwa sara, A sa tete na tabana me vaka na kau drokadroka sa tei e na kena qele dina.

³⁶ Ia ka'u sa qai lako tani tale, ka raica, sa yali: Ia ka'u a vakasaqarai koya, ka sa sega ni kune.

³⁷ Vakasamataka na tamata yalododonu, ka raica na daucaka dodonu: Ni sa kenai otioti ni tamata ko ya na vakacegu.

³⁸ Ia ko ira na dautalaidredre era na vakarusai vata: Ka sa kedrai otioti na tamata ca me ra muduki laivi.

³⁹ Sa ka maivei Jiova na nodra vakabulai na yalododonu: A nodra kaukauwa ko koya e na gauna rarawa.

⁴⁰ Ena vukei ira talega ko Jiova, ka vakabulai ira: Ena vakabulai ira maivei ira na tamata ca, ka na maroroi ira, Ni ra sa vakararavi vua.