NA SAME 36 - Vakavakadewa Makawa

Era sa rarawa na tamata ca: sa vinaka ga na tamata e na vuku ni loloma ni Kalou. Vua na Domo-ni-sere. A Same i Tevita na tamata i Jiova.

¹ Sa kaya e na vu ni yaloqu nai valavala ca ni tamata ca, Ni sa sega vua na rerevaka na Kalou.

² Ni sa daudokadokai koya vakataki koya ga, Ni na sega ni kune na nonai valavala ca, ka sa vakasisilataki.

³ A vosa ni gusuna na veivakaisini kei na ka lasu: Sa mudu ga ni vuku ka me caka vinaka.

⁴ Sa nakita ga na ca e na nonai mocemoce; Sa vakataudeitaki koya e na sala sa sega ni vinaka; Sa sega ni biuta na ca.

⁵ I Jiova, sa yala ki lomalagi na nomuni loloma; Kei na nomuni dina ki na o.

⁶ Sa vaka na ulu-ni-vanua lelevu na nomuni yalododonu; A wasawasa titobu na nomuni lewa; I Jiova, Ko ni sa maroroya na tamata kei na manumanu.

⁷ A ka talei vakaidina na nomuni yalololoma, na Kalou! O koya oqo era vakaruru kina na luve ni tamata ki ruku ni tabamuni.

⁸ Era na vakamamautaki sara e na ka vinaka ni nomuni vale; Ia kemuni na vagunuvi ira e na nomuni uciwai ni marau.

⁹ Ni sa tu vei kemuni na waivure ni bula: Keimami na raica na rarama e na nomuni rarama.

¹⁰ Me tu ga na nomuni yalololoma vei ira sa kilai kemuni; Kei na nomuni yalododonu vei ira era sa yalododonu.

¹¹ Me kakua ni lako vakaca mai vei au na yavana na viavialevu, Me kakua talega ni vakasesei au na liga ni tamata ca.

¹² Era sa bale ki kea na daucakacaka ca; Era sa vakabalei sobu, a ra na sega ni tu cake rawa.