NA SAME 34 - Vakavakadewa Makawa

Ai vakaro vei ira na tamata me ra vakavinavinaka vua na Kalou, ka vakararavi vua, ka rerevaki koya ni ra na kalougata kina. A Same i Tevita, ni sa dua tani mai na nonai valavala e na mata i Apimeleki: o koya ka vakatalai koya tani, ka sa lako.

¹ Au na vakavinavinaka vei Jiova e na gauna kecega; Ena tikotiko ga e na gusuqu na vakamolimoli vua.

² Ena marautaki Jiova na yaloqu; Ena rogoca ko ira na yalomalumalumu ka reki kina.

³ Tou mai vakacaucautaka na yaca i Jiova, Ia me da doka vata na yacana.

⁴ Au a vakasaqarai Jiova, ka sa rogoci au, Ka sa vakabulai au mai na noqu rere kecega.

⁵ Era sa ta cake vua, ka ra sa vakararamataki; Ka sa sega ni madua na matadra.

⁶ Sa tagi na tamata dravudravua oqo, ka sa vakarorogo ko Jiova, Ka vakabulai koya mai na nona rarawa kecega.

⁷ Na agilose i Jiova, sa tiko vakavolivoliti ira era sa rerevaki koya, Ka sa vakabulai ira.

⁸ Dou tovolea mada ka raica ni sa yalovinaka ko Jiova; Sa kalougata na tamata sa vakararavi vua.

⁹ Dou rerevaki Jiova, koi kemudou na nona tamata yalosavasava: Ni sa sega na ka me yali vei ira era sa rerevaki koya.

¹⁰ Era sa dravudravua na luve ni laioni, ka viakana; Ia ena sega na ka vinaka me yali vei ira era sa vakasaqarai Jiova.

¹¹ Dou lako mai, ragone, vakarorogo mai vei au; Ka'u na vakavulici kemudou mo dou rerevaki Jiova.

¹² O cei na tamata sa vinakata na bula. Ka sa via raica na veisiga vinaka?

¹³ Tarova na yamemu mai na ca, Kei na tebenigusumu me kakua ni vosataka na ka lasu.

¹⁴ Lesu tani mai na ca, ka kitaka na ka vinaka; Qara na veivinakati, ka muria sara.

¹⁵ Sa vakaraici ira na tamata yalododonu ko Jiova, Ka sa qara tu na daligana ki na nodra masu.

¹⁶ Sa dua tani na mata i Jiova vei ira sai valavala ca, Me bokoca laivi e vuravura na kedrai vakananumi.

¹⁷ Era sa tagi na yalododonu, a sa rogoca ko Jiova, Ka sa vakabulai ira mai na nodra rarawa kecega.

¹⁸ Sa voleka ko Jiova vei ira sa ramusu na yalodra; Ka sa vakabulai ira sa dasila na lomadra.

¹⁹ Sa levu na ka rarawa sa yaco vua na yalododonu; Ia sa vakabulai koya ko Jiova mai na ka kecega.

²⁰ Sa maroroya kecega na suina; Sa sega e dua sa musulaki.

²¹ Ena vakamatei ira na tamata ca na ka ca: Era na vakacalai ko ira sa cati koya na yalododonu.

²² Sa vakabula na yalodra na nona tamata ko Jiova: Ia ena sega ni vakacalai e dua vei ira sa vakararavi vua.