NA SAME 32 - Vakavakadewa Makawa

Sa kalougata na tamata ni sa sega ni cudruvi koya na Kalou e na vuku ni valavala ca, 1,2. Ka sa yaga me da vakatusa na nodai valavala ca me lomani keda na Kalou, me da reki kina, 3-11. A Same i Tevita. A Masikili.

¹ Sa kalougata ko koya sa bokoci na nonai valavala ca, ka sa buluti na nona caka cala.

² Sa kalougata na tamata sa sega ni wilika vua ko Jiova nai valavala ca; Ka sa sega na dauveivakaisini e na yalona.

³ Ni'u sa galu tiko, sa vuca na suiqu E na vuku ni noqu vutugu e na siga ka bogi mai.

⁴ Ni sa bibi vei au na ligamuni e na siga kei na bogi; Sa maca sara na yagoqu ka sa vaka na ka e raqosa e na vula i katakata. Sela.

⁵ Au a vakatusa vei kemuni na noqu caka cala, ia ka'u sa sega ni vunia na noqu i valavala ca; Au a kaya, Ka'u na vakatusa vei Jiova na noqu i valavala ca; Ia ko ni sa qai kauta tani na kena ca ni noqu i valavala ca. Sela.

⁶ E na vuku ni ka oqo ena masu kina vei kemuni na tamata yalododonu kecega e na gauna ko ni na kune rawa kina; E dina, ni sa yaco na waluvu levu ena sega ni volekati koya.

⁷ Oi kemuni na noqu i vunivuni; ko ni na maroroi au mai na ka rarawa; Ko ni na vakavolivoliti au e na sere ni bula. Sela.

⁸ Au na vakavulici iko ka vakatakila vei iko na sala mo lako kina: Ka'u na rai tiko vei iko ka tuberi iko.

⁹ Dou kakua ni vaka na ose, se na meule, sa sega ni vuku rawa; E tarovi ga na gusudrau e na kaukamea kei nai tarovi, De rau bese ni torovi iko.

¹⁰ Ena levu na nodra ka rarawa na tamata ca; Ia ko koya sa vakararavi vei Jiova, ena vakavolivoliti koya na loloma.

¹¹ Dou marautaki Jiova, ka reki, koi kemudou na yalododonu: Dou kaila e na marau, koi kemudou kecega sa yalodina.