NA SAME 29 - Vakavakadewa Makawa

Ai vakaro vei ira na turaga kei vuravura me ra cuva vei Jiova, ni sa kaukauwa ko koya, ka sa lomani ira na nona tamata. A Same i Tevita.

¹ Dou ia vei Jiova, koi kemudou na luve ni qaqa; Dou ia vei Jiova na vakarokoroko kei na kaukauwa.

² Dou vakarokoroko ki na yaca i Jiova me vaka sa dodonu: Dou cuva vei Jiova e nai ukuuku ni yalosavasava.

³ Sa rogo e na dela ni wai na domo i Jiova; Sa kurukuru na Kalou vakaiukuuku; Sa tu e na wai levu ko Jiova.

⁴ Sa rogo vakaukauwa na domo i Jiova; Sa rogo vakaturaga na domo i Jiova.

⁵ Sa musuka na sitari na domo i Jiova; Io, sa musuka na sitari ni Lepanoni ko Jiova.

⁶ Sa vakaladetaka ko koya me vaka na luve ni pulumokau; Ko Lepanoni, kei Sirioni, me vaka na luve ni iunikoni.

⁷ A domo i Jiova sa tasea na yameyame ni bukawaqa.

⁸ Sa kurea na veikau na domo i Jiova; Sa kurea ko Jiova na veikau ko Ketesa.

⁹ A domo i Jiova sa taratara kina na me kila Ka sa tacovi kina na veikau; A sa vakavinavinaka ko ira kece yadua e nona vale tabu.

¹⁰ Sa tiko e na waluvu ko Jiova; Io, sa tiko vakaturaga ko Jiova ka sega ni mudu.

¹¹ Ena solia ko Jiova na kaukauwa vei ira na nona tamata; Ena vakalougatataka na nona tamata ko Jiova ni sa vakacegui ira.