NA SAME 27 - Vakavakadewa Makawa

A masu me ra vakabulai mai na meca era lewe vuqa; a sa vakaukauwataki. A Same i Tevita.

¹ A noqu rarama kei na noqu i vakabula ko Jiova; ko cei me'u rerevaka? A kaukauwa ni noqu bula ko Jiova; me'u taqaya e na vuku i cei?

² Ni ra sa lako vakaivalu mai vei au na tamata ca kei na noqu meca Me ra kania na lewequ, era sa tarabe ka bale.

³ Kevaka era sa mai tuvai valu vei au na mataivalu e le vuqa, Ena sega ni rere na yaloqu: Kevaka sa yaco vei au nai valu, Ka'u na vakararavi ga ni na vakakina.

⁴ E dua na ka ka'u sa gadreva vei Jiova, oqori ga ka'u na segata tiko; Me'u tiko e na vale i Jiova e na veisiga kecega ni noqu bula, Me'u vakaraica na lagilagi i Jiova, ka vakatarotaro tiko e na nona vale ni soro.

⁵ Ni na vunitaki au e na nona vale e na gauna ni rarawa: Ena vunitaki au e na yasana vuni e na nona vale laca: Ena vakaturi au ko koya ki na dela ni vatu.

⁶ Ena qai laveti cake na uluqu me cecere cake vei ira na noqu meca era sa vakavolivoliti au: Ia ka'u na vakacabora nai madrali ni marau e na nona vale laca; Ka'u na sere, io, ka'u na seretaka na vakavinavinaka vei Jiova.

⁷ Ni rogoci au, Jiova, ni sa rogo na noqu tagi: Lomani au talega, ka vosa mai vei au.

⁸ Ni kemuni a kaya, Dou vakasaqara na mataqu; sa kaya vei kemuni na yaloqu, A matamuni, Jiova, ka'u na vakasaqara.

⁹ Ni kakua ni vunia na matamuni vei au; Kakua ni biuta tani na nomuni tamata e na nomuni cudru: Koi kemuni ga na noqu i vukevuke; Kakua ni vakatalai au tani, se laivi au, na Kalou na noqu i vakabula.

¹⁰ Ni sa laivi au na tamaqu kei na tinaqu, Ena qai keveti au cake ko Jiova.

¹¹ Ni vakavulici au, Jiova, e na nomuni sala, Ka tuberi au e na sala dodonu, E na vukudra na noqu meca.

¹² Ni kakua ni soli au ki na nodra veitalia na noqu meca: Ni sa tu cake vei au ko ira na dauveibeitaki vakailasu, kei ira era sa cavuta tiko na vakacaca.

¹³ Kevaka ka'u a sega ni vakadinata me'u raica na yalovinaka i Jiova E na vanua ni bula, sa qai waicala na yaloqu.

¹⁴ Mo waraki Jiova: Gumatua, ena qai vakataudeitaka na yalomu ko koya: Io, mo waraki Jiova ga.