NA SAME 26 - Vakavakadewa Makawa

A masu ni tamata e vereti ni sa lasutaki, a sa vakararavi ga vua na Kalou. A Same i Tevita.

¹ I Jiova, mo ni lewai au; ni'u a muria lako na noqu yalododonu: Au a vakararavi talega vei Jiova; ka'u na sega ni tidara.

² Mo ni vakadikevi au, Jiova, ka vakatovolei au; Vakatovolea na noqu ivi kei na yaloqu.

³ Ni sa tu ga e mataqu na nomuni yalololoma: Ka'u sa muria lako talega na nomuni dina.

⁴ Au na sega ni tiko vata kei ira na tamata lasulasu, Ka'u na sega talega ni lako vata kei ira era dauveivakaisini.

⁵ Au sa cata nai soqosoqo tamata caka ca; Ka'u na sega ni tiko vata kei ira nai valavala ca.

⁶ Au na vuluvulu ni ka'u sa sega ni cala: Ka'u na vakavolivolita vakakina na nomuni cabocabo-ni-soro, I Jiova:

⁷ Me'u vakarogoya voli e na domo ni vakavinavinaka, Ka tukuna kecega na nomuni cakacaka e veivakurabuitaki.

⁸ I Jiova, au sa vinakata na vale ko ni sa dautiko kina, Kei na yasana sa tiko kina na nomuni ukuuku.

⁹ Mo ni kakua ni kauta vata na yaloqu kei ira na tamata ca, Se na noqu bula kei ira na tamata era dauveivakamatei:

¹⁰ Sa tiko e na ligadra na ca, Ka sa sinai na ligadra i matau e na tautauri ni vere.

¹¹ Ia koi au, ka'u na muria lako na noqu yalododonu: Ni vakabulai au, ka lomani au mai.

¹² Sa tu ga na yavaqu e na vanua vinaka: Ka'u na vakavinavinaka vei Jiova e nai soqosoqo.