NA SAME 22 - Vakavakadewa Makawa

Sa tagi vua na Kalou ko Tevita ni sa vakararawataki ka rere, 1-10. Sa masu vua, 11-21. Sa qai vakavinavinaka, 22-31. Vua na Domo-ni-sere e na Aijeleca Saara. A Same i Tevita.

¹ Noqu Kalou! noqu Kalou! o ni sa biuti au e na vuku cava? A cava ko ni sa yawa kina ka sega ni vakabulai au, se rogoca na vosa ni noqu vutugu?

² Noqu Kalou! au sa tagi e na siga, ia ko ni sa sega ni rogo mai; Kei na bogi talega, ia ka'u sa sega ni vakacegui.

³ Ia ko ni sa yalosavasava ga, Koi kemuni sa dautiko kei na nodra vakavinavinaka na Isireli.

⁴ Sa vakararavi vei kemuni ko ira na tama i keimami. E ra a vakararavi vei kemuni, ia ko ni a vakabulai ira.

⁵ Era a tagi vei kemuni, a ra sa vakabulai: Era a vakararavi vei kemuni, a ra sa sega ni vakamaduataki.

⁶ Ia koi au na baca ni qele, ka'u sa sega ni tamata; Era sa vakasewasewani au na tamata, a ra sa beci au ko ira na lewe vuqa.

⁷ Era sa dredrevaki au ko ira kece era sa raici au: Era vakabegusu, era sa kuretaka na uludra, ka kaya,

⁸ Sa vakararavi vei Jiova ko koya oqo me vakabulai koya: Me mani vakabulai koya ga, kevaka sa rekitaka.

⁹ Ia sai kemuni sa kauti au mai na kete i tinaqu: O ni sa maroroi au ni'u sa sucuma tiko na sucu i tinaqu.

¹⁰ Au a biu tu ga vei kemuni ni'u sa qai sucu: Oi kemuni ka noqu Kalou ni'u sa qai lako mai na kete i tinaqu.

¹¹ Mo ni kakua ni yawa tani vei au; ni sa toro voleka mai na rarawa; A sa sega e dua me vukei au.

¹² Sa ka levu na pulumokau tagane era sa vakavolivoliti au; Sa tu vakavolivoliti au na pulumokau tagane kaukauwa ni Pasani.

¹³ Sa dalaga vei au, Me vaka na laioni sa dauveidresulaki ka dautagi.

¹⁴ Au sa sovaraki yani me vaka na wai, Ka sa mavule kecega nai sema ni suiqu: Sa vaka na drega ni vola na yaloqu, Sa waicala e loma ni ketequ.

¹⁵ Sa mamaca na noqu kaukauwa me vaka nai caca ni bilo, Ka sa kabi ki na galegalequ na yamequ; O ni sa kauti au ki na kuvu-ni-soso ni mate.

¹⁶ Ni sa vakavolivoliti au ko ira na koli; Era sa vakavolivoliti au nai soqosoqo ni tamata lomaca: Era sa coka na ligaqu kei na yavaqu.

¹⁷ Au sa wilika kecega na suiqu: Era sa wanonovi au ka vakaraici au matua.

¹⁸ Era sa vota vei ira na noqu i sulu, Ka ra sa vota na noqu i tutuvi e na vakawiri madigi.

¹⁹ Ia koi kemuni, Jiova, mo ni kakua ni yawa tani vei au: Na vu ni noqu kaukauwa, mo ni kusarawa me vukei au.

²⁰ Ni vakabula na yaloqu mai nai seleiwau; Na noqu ka talei duaduaga mai na kaukauwa ni koli.

²¹ Ni vakabulai au mai na gusu ni laioni: Ni kemuni a rogoci au mai nai leu ni iunikoni.

²² Au na vakatusa na yacamuni vei ira na wekaqu: E na kedra maliwa nai soqosoqo lewe ni lotu ka'u na vakavinavinaka vei kemuni.

²³ Oi kemudou sa rerevaki Jiova, dou vakavinavinaka vua; Dou vakacaucautaki koya, koi kemudou kecega na kawa i Jekope; Dou rerevaki koya, koi kemudou kecega na kawa i Isireli.

²⁴ Ni sa sega ni beca se cata na rarawa ni tamata sa vakararawataki; Ka sa sega ni vunia vua na matana; Ia sa rogoci koya, ni sa tagi vua.

²⁵ Au na vakamolimoli ga vei kemuni e nai soqosoqo levu: Na ka ka'u a yalataka ka'u na kitaka e na matadra era rerevaki koya.

²⁶ Era na kana ka mamau ko ira sa yalomalumalumu: Era na vakavinavinaka vei Jiova ko ira era sa vakasaqarai koya: Ena bula na yalomudou ka sega ni mudu.

²⁷ Era na vakanananu kecega nai yalayala kei vuravura, ka saumaki vei Jiova: Era na lotu e matamuni ko ira kecega na veimataqali ni veivanua.

²⁸ Ni sa nei Jiova na matanitu; Ia ko koya ga sa turaga vei ira na veimatanitu;

²⁹ O ira kecega era sa levulevu e vuravura, era na kana ka lotu: Kei ira kecega era lako sobu ki na kuvu-ni-soso era na cuva vua. Io, ko koya ka sega ni vakabula rawa na yalona.

³⁰ Ena qaravi koya e dua na kawa; Ena okati vua na Turaga me nona kawa.

³¹ Era na lako mai ka vakatusa na nona yalododonu. Vei ira na tamata era na sucu mai, ni sa cakava oqori ko koya.