NA SAME 20 - Vakavakadewa Makawa

A masumasu sa bale vua na tui. Vua na Domo-ni-sere. A Same i Tevita.

¹ Me rogoci iko ko Jiova e na siga ni rarawa; Me maroroi iko na yaca ni Kalou i Jekope;

² Me soli vei iko na veivuke mai na nona vale tabu, Ka vakaukauwataki iko mai Saioni.

³ Me nanuma kecega na nomu i soro, Ka vakadonuya kecega na nomu i madrali kama. Sela.

⁴ Me solia vei iko na gagadre ni yalomu, Ka vakayacora kecega na nomu i naki.

⁵ Keitou na reki ni kemuni sa vakabulai keitou, Keitou na vakarewataka na drotini e na yaca ni noda Kalou: Me vakayacora kecega na nomu masumasu ko Jiova.

⁶ Au sa qai kila ni sa vakabulai koya ka lumuta ko Jiova: Ena rogoci koya mai na nona lomalagi tabu E na kaukauwa ni ligana i matau sa dauia na veivakabulai.

⁷ Sa vakararavi ko ira eso e na qiqi-ni-valu, eso tale e na ose: Ia koi keda eda sa vakararavi ga e na yaca i Jiova na noda Kalou.

⁸ O ira, era sa vakalolovirataki sobu ka bale; Ia koi keda, eda sa tu cake ka wavu tu.

⁹ I Jiova, mo ni ia na veivakabulai; Me vakarogoci keitou na Tui e na siga keitou sa masu kina vua.