NA SAME 19 - Vakavakadewa Makawa

Sa tukuni Jiova na nona cakacaka, kei na nona vosa. Vua na Domo-ni-sere. A Same i Tevita.

¹ Sa tukuna na lagilagi ni Kalou ko lomalagi; Ka sa vakatakila na cakacaka ni ligana na maliwa levu.

² Sa dautukuna na vosa na veisiga sa veitarataravi, Ka sa vakaraitaka na vuku na veibogi sa veitarataravi,

³ Sa sega nai tukutuku, sa sega na vosa, Sa sega ni rogo na domodra.

⁴ Sa lako yani ga ki vuravura taucoko na nodra i vakarau, Kei na nodra vosa ki nai yalayala kei vuravura. Sa viritoka ko koya me tu kina na kena vale na mata-ni-siga,

⁵ O koya sa vaka na tagane sa qai vakawati sa lako mai na nonai vakaruru vakaiukuuku, A sa marau me vaka na qaqa ni sa la'ki cici cere.

⁶ Sa vakatekivu na nonai cadracadra e na vu ni lomalagi, Kei na nonai lakolako sa yacova na kenai yalayala: Ka sa sega na ka sa vakarurugi rawa mai na kena katakata.

⁷ Sa vinaka sara na vunau i Jiova, ka sa saumaka na yalo: Sa dina nai tukutuku i Jiova, ka sa vakavukui ira era sa sega ni vuku.

⁸ Sa dodonu nai lesilesi i Jiova, ka sa vakamarautaka na yalo: Sa savasava nai vakaro i Jiova, ka sa vakararamataka na matada:

⁹ Sa savasava na rerevaki Jiova, ka sa tu dei ka tawa mudu: Sa dina na lelewa i Jiova, ka sa dodonu kecega.

¹⁰ A ka oqo sa daugadrevi vakalevu cake, ka vakalailai na koula, io, na koula vinaka sara e levu: Sa uasivi cake e na oni na kena kamikamica, io, e na qa ni oni.

¹¹ Sa vakasalataki talega na nomuni tamata e na ka oqo: Ka sa levu na kenai sau ni sa vakabauti tiko.

¹² O cei sa kila rawa na nona caka cala? Mo ni vakasavasavataki au mai nai valavala ca sa vuni tu.

¹³ Ni tarova talega na nomuni tamata me'u kakua ni douvaka na ca; Me kakua ni daurawai au: ka'u na qai dodonu sara, Ka'u na sega talega ni cala e nai valavala ca levu;

¹⁴ Me vinaka vei kemuni na vosa ni gusuqu, kei na vakanananu ni yaloqu, I Jiova, na noqu uluvatu, kei na noqu i vakabula.