NA SAME 17 - Vakavakadewa Makawa

A masu sa ia e na gauna ni veivakacacani A masu i Tevita.

¹ I Jiova, mo ni rogoca na kena dodonu, ni vakarorogo ki na noqu tagi, Ni rogoca na noqu masu, sa sega ni lako mai na tebenigusu lasulasu.

² Me lako dina mai na matamuni na lewa e na vukuqu; Me vakaraica ga na matamuni na ka e dodonu.

³ O ni sa vakatovolea na yaloqu; o ni sa lako mai vei au e na bogi; Ko ni a vakatovolei au sara, ia sa sega na ka ko ni na kunea; Sa lomaqu ga me sega ni lako vakatani na gusuqu.

⁴ E na vuku ni nodra cakacaka na tamata, Ka'u a maroroi au e na vosa ni tebenigusumuni mai na nonai valavala na dauveivakarusai.

⁵ Vakataudeitaka na noqu lako tiko e na nomuni sala, Me kakua ni yavala nai lakolako ni yavaqu.

⁶ Au sa tagi vei kemuni, ko ni na rogoci au, na Kalou: Mo ni vakarorogo kivei au, io, ki na noqu vosa.

⁷ Ni vakatakila mai na nomuni loloma e veivakurabuitaki, kemuni sa vakabulai ira e na ligamuni matau, era sa vakararavi ga vei kemuni, Maivei ira era sa tu cake mai.

⁸ Ni maroroi au me vaka na loa ni mata, Vunitaki au e ruku ni yaloyalo ni tabamuni,

⁹ Maivei ira na tamata ca era sa vaqeavutaki au, Maivei ira na noqu meca era sa vakavolivoliti au me'u mate.

¹⁰ Era sa kovuni e na nodra uro: Sa vosa vakaviavialevu na gusudra.

¹¹ Era sa vakavolivoliti keitou e na neitou i lakolako: Ka sa wanono ki na qele na matadra.

¹² O koya oqo sa tautauvata kei na laioni sa gu me ia na veidresulaki; Kei na luve ni laioni sa lako lo e na yasana vuni.

¹³ I Jiova, ni tu cake, Taumadaki koya, ka vakabalei koya sobu: Ni vakabula na yaloqu mai na tamata ca, e na nomuni seleiwau;

¹⁴ Maivei ira na tamata e na ligamuni, Jiova, Maivei ira na tamata ni vuravura oqo era sa rawata na nodra i votavota e na nodra bula oqo, O ni sa vakamamautaka na ketedra e na nomuni yau vuni: Sa ka levu tu na luvedra, Ka ra sa tataunaka na vo ni nodra i yau me nodra na luvedra lalai.

¹⁵ Ia koi au, ka'u na raica na matamuni e na yalododonu: Ka'u na qai cegu ni'u sa yadra tale, ka sa ucui kemuni.