NA SAME 15 - Vakavakadewa Makawa

A kenai tukutuku na tamata sa rerevaki Jiova. A Same i Tevita.

¹ I Jiova, o cei ena tiko e na nomuni vale? O cei ena tiko vakadua e na nomuni ulu-ni-vanua tabu?

² O koya sa lako vakadodonu, ka kitaka nai valavala dodonu, Ka vosa dina tiko mai na vu ni yalona.

³ O koya sa sega ni kakase na yamena, Se caka ca vua na kai nona, Se cavuta nai rogorogo sa vakacacataki kina na wekana.

⁴ Sa beca na tamata velavela na matana; Ka sa dokai ira era sa rerevaki Jiova. Ke sa bubului ka qai ca kina ko koya, ia sa sega ni veivutunitaka tale.

⁵ Sa sega ni solia na nonai lavo me rui levu kina na kenai kere, Sa sega talega ni vakadonuya nai tautauri me ca na tamata dodonu. O koya sa kitaka na ka oqo ena sega sara ni yavalati rawa.