NA SAME 148 - Vakavakadewa Makawa

Me ia na vakavinavinaka vei Jiova.

¹ Dou ia vei Jiova na vakavinavinaka. Dou vakavinavinaka vei Jiova mai na lomalagi: Dou vakavinavinaka vua mai na vanua cecere.

² Dou vakavinavinaka vua, na nona agilose kecega: Dou vakavinavinaka vua, na nonai valu kecega.

³ Drau vakavinavinaka vua, na mata-ni-siga kei na vula: Dou vakavinavinaka vua, na kalokalo kecega sa serau tu.

⁴ Dou vakavinavinaka vua, na lomalagi e cake sara, Kei na wai sa sivia na lomalagi.

⁵ Me ra ia na vakavinavinaka ki na yaca i Jiova: Ni sa vakarota ko koya, ka ra sa buli mai.

⁶ Ka sa vakataudeitaki ira ko koya me ra yacova na veigauna kecega: Sa lesia ko koya na kedrai yalayala me ra sega ni sivia rawa.

⁷ Dou vakavinavinaka vei Jiova mai vuravura, Na tavuto, kei na ka kecega e na wai titobu:

⁸ Na bukawaqa, kei na uca-cevata; na uca-vulavula, kei na kabukabu; Na cagi liwa, ka vakayacora tiko na nona vosa;

⁹ Na ulu-ni-vanua, kei na ulu-ni-koro kecega; A kau dauvua, kei na sitari kecega:

¹⁰ A manumanu kila, kei na manumanu lasa kecega; Na ka sa qasi voli; kei na manumanu vuka:

¹¹ Na tui kei vuravura, kei na lewe ni veivanua kecega; Na turaga, kei na turaga ni lewa kecega kei vuravura:

¹² Na cauravou, kei na goneyalewa; Na tamata qase, kei na gone:

¹³ Me ra ia na vakavinavinaka ki na yaca i Jiova: Ni sa ka talei duaduaga na yacana; Sa sivia na vuravura kei na lomalagi na nona lagilagi.

¹⁴ A sa vueta cake ko koya na nodra totoka na nona tamata, Na nodra vakavinavinaka na nona tamata yalosavasava kecega; Io na nodra na Isireli, a matanitu sa voleka vua. Dou ia vei Jiova na vakavinavinaka.