NA SAME 147 - Vakavakadewa Makawa

Me ia na vakavinavinaka vei Jiova.

¹ Dou ia na vakavinavinaka vei Jiova: Ni sa ka vinaka me seretaka na vakavinavinaka vua na noda Kalou; Ni sa ka kamikamica; ka sa kilikili na vakavinavinaka.

² Sa tarai Jerusalemi cake ko Jiova: Sa soqoni ira vata na Isireli era sa vakasevi.

³ Sa vakabulai ira sa ramusu na yalodra, Ka sa vauca na nodra vue.

⁴ Sa wilika ko koya na kedrai wiliwili na kalokalo; Sa vakayacani ira kecega.

⁵ Sa levu na noda Turaga, ka levu na nona kaukauwa: Ka sa sega ni kilai rawa na nona vuku.

⁶ Sa vakalevulevui ira na yalomalumalumu ko Jiova: Sa vakabalei ira ki na qele nai valavala ca.

⁷ Dou seretaka na vakamolimoli vei Jiova: Dou sere e na api vua na noda Kalou:

⁸ O koya sa tabonaka na lomalagi e na o, O koya sa vakarautaka na uca me tau ki vuravura, O koya sa vakatubura na co e na veiulu-ni-vanua.

⁹ O koya sa solia na kedra na manumanu, Kei na kedra na luve ni reveni ni ra sa tagi.

¹⁰ Sa sega ni marautaka ko koya na kaukauwa ni ose: Sa sega ni rekitaka na yava ni tamata.

¹¹ Sa rekitaki ira ko Jiova era sa rerevaki koya, Ko ira era sa nuitaka na nona loloma.

¹² Mo vakavinavinaka vei Jiova, ko iko Jerusalemi; Mo ia na vakavinavinaka vua na nomu Kalou, ko iko Saioni.

¹³ Ni sa vakaukauwataka ko koya na samugakagaka ni nomu matamata-ni-koro; Sa vakalougatataki ira na luvemu e na nomu loma ni koro.

¹⁴ Sa vakayacora na sautu ko koya e na nomu vanua, Ka sa vakamamautaki iko e na witi vinaka sara.

¹⁵ Sa tala yani na nona vunau e vuravura: Sa cici vakusakusa sara na nona vosa.

¹⁶ Sa solia mai na uca-vulavula me vaka na vutika ni sipi: Sa vakamimiraca na tegu cevata me vaka na dravusa.

¹⁷ Sa vakatauca na wai cevata me vaka na meme ni kakana: O cei sa vosota rawa na nona liliwa?

¹⁸ Sa vosa yani ko koya, ka vakawaicalataka: Sa vakaliwava na nona cagi, sa qai dave yani na wai.

¹⁹ Sa tukuna na nona vosa vei ira na Jekope, Na nona vunau kei na nona lewa vei ira na Isireli.

²⁰ Sa sega ni caka vakaoqo ko koya ki na dua na matanitu: Ia era sa sega ni kila na nona lewa. Dou ia na vakavinavinaka vei Jiova.