NA SAME 145 - Vakavakadewa Makawa

A Same ni vakavinavinaka, ka nei Tevita.

¹ Au na vakacaucautaki kemuni, na noqu Kalou, na Tui; Ia ena sega ni mudu na noqu vakavinavinaka ki na yacamuni.

² E na veisiga kecega ka'u na vakavinavinaka vei kemuni; Ia ena sega ni mudu na noqu seretaka na yacamuni.

³ Sa levu ko Jiova, a sa dodonu me vakavinavinakataki vakalevu; Ia sa sega ni kilai rawa na kena levu.

⁴ Ena seretaka na nomuni cakacaka na veitabatamata era sa veitaravi, Ka tukuna na nomuni cakacaka kaukauwa.

⁵ Au na cavuta voli na lagilagi ni kemuni rogorogo vakaturaga levu, Kei na nomuni cakacaka sa veivakurabuitaki.

⁶ Ia era na vosataka na kena kaukauwa na nomuni cakacaka rerevaki: Ia ka'u na tukuna voli talega na nomuni levu.

⁷ Era na daucavuta tikoga na ka me nanumi kina na nomuni yalololoma levu, Ka seretaka na nomuni cakacaka dodonu.

⁸ Sa daulomasoli ko Jiova, ka yalololoma; Sa dauberabera ni cudru, a sa levu na nona loloma.

⁹ Sa yalovinaka ko Jiova vei ira na tamata kecega: Ka sa yacova na nona cakacaka kecega na nona yalololoma.

¹⁰ Sa vakacaucautaki kemuni Jiova, na nomuni cakacaka kecega: Ka ra sa vakavinavinakataki kemuni na nomuni tamata yalododonu.

¹¹ Era sa vosataka na kena totoka ni nomuni matanitu, Ka veivosakitaka na nomuni kaukauwa;

¹² Me ra vakarogoya vei ira na luve ni tamata na nona cakacaka kaukauwa, Kei na lagilagi vakaturaga ni nona matanitu.

¹³ A nomuni matanitu sa tiko ga e na veigauna kecega ka sega ni mudu, Ka sa yacova nai tabatamata kecega na nomuni lewa.

¹⁴ Sa tokoni ira kecega era sa bale ko Jiova, Ka sa vakatudonutaki ira kecega era sa vakalairoro.

¹⁵ Sa rai vei kemuni na matadra na ka kecega; Ia ko ni sa solia vei ira na kedra kakana e na gauna e dodonu kina.

¹⁶ O ni sa dedeka na ligamuni, Ka vakamamautaka na ka bula kecega e na ka era gadreva.

¹⁷ Sa dodonu ko Jiova e na nonai valavala kecega, Ka yalololoma e nona cakacaka kecega.

¹⁸ Sa voleka ko Jiova vei ira kecega era sa masu vua, Vei ira kecega era masu vua e na yalodina.

¹⁹ Ena vakayacora ko koya na ka era gadreva ko ira era rerevaki koya: Ena rogoca talega na nodra tagi, ka na vakabulai ira.

²⁰ Sa maroroi ira kecega era lomani koya ko Jiova: Ia ena vakawabokotaki ira kecega nai valavala ca.

²¹ Ena vosataka na gusuqu na nona vinaka ko Jiova, Ia me vakavinavinakataka talega na yacana tabu na tamata kecega, ka sega ni mudu.