NA SAME 144 - Vakavakadewa Makawa

Sa vakavinavinaka vua na Kalou ko Tevita e na vukuna kei ira na tamata, 1-4, ka sa masu me vakabulai koya vakaukauwa na Kalou, 5-10. Sa masu me vinaka na matanitu, 11-15. A Same i Tevita.

¹ Me vakacaucautaki ko Jiova na noqu kaukauwa, O koya sa vakavulica na ligaqu me ia nai valu, Kei nai qaqalo ni ligaqu me vala:

² O koya sa lomani au, ka sa noqu i drodro; Na noqu vale ni valu cecere, kei na noqu i vakabula; A noqu i sasabai, kei koya ka'u sa vakararavi kina; O koya sa vakamalumalumutaki ira na noqu tamata vei au.

³ I Jiova, a cava na tamata, mo ni kilai koya kina! Se na luve ni tamata, mo ni nanumi koya kina!

⁴ Sa vaka na ka wale na tamata: Na nona gauna sa vaka na yaloyalo sa yali rawarawa.

⁵ Mo ni vakalolovirataka na nomuni lomalagi, Jiova, ka lako sobu mai: Mo ni tara na veiulu-ni-vanua, ena qai kubou yani.

⁶ Mo ni vakacaudreva na livaliva, ka vakasevi ira: Vanataka na nomuni gasau, ka vakubutaki ira.

⁷ Ni dodoka mai na ligamuni maicake; Vueti au, ka vakabulai au mai na wai levu, Mai na ligadra na luve ni kai tani;

⁸ O ira era sa dauvosa vakailasu e na gusudra, Ia na ligadra i matau na liga daulasulasu.

⁹ Au na seretaka na sere vou vei kemuni na Kalou: E na soliteri e tini na kena wa ka'u na sere vei kemuni.

¹⁰ O koya ga sa solia vei ira na tui me ra gumatua: O koya sa vakabulai Tevita na nona tamata mai nai seleiwau sa vakacaca.

¹¹ Ni sereki au, ka vakabulai au mai na ligadra na kai tani, O ira era sa dauvosa vakailasu na gusudra, A sa liga daulasu na ligadra i matau:

¹² Ia na neimami gonetagane, me ra vaka na kau ni ra sa tubu e nodra cauravou; Kei na neimami goneyalewa, me ra vaka na vatu e na tutu ni vale sa solo me vatu ni vale vakaturaga:

¹³ A neimami lololo, me oso me kau rawa maikina na kakana kecega sa duidui: Me luvei udolu na neimami sipi, ia me udolu vakatini e na neimami vanua veico:

¹⁴ Me kaukauwa me colai yaya na neimami pulumokau; Me kakua na basu bai, kei na se, Me kakua na tagi e na neimami saqata ni koro;

¹⁵ Sa kalougata na tamata, era vakakina: Io, sa kalougata na tamata sa nodra Kalou ko Jiova.