NA SAME 142 - Vakavakadewa Makawa

A masu sa ia e na gauna ni veivakacacani. A Masikili i Tevita. A masu ni sa tiko e na qara-vatu.

¹ Au a tagi vei Jiova e na domoqu; Ia e na domoqu ka'u a vakamamasu vei Jiova.

² Au a sova e matana na noqu tagi; Au a vakatakila e matana na noqu rarawa.

³ Ni sa luvu e lomaqu na yaloqu, ko ni a kila na noqu i lakolako. E na sala ka'u a lako kina era vunia kina nai cori vei au.

⁴ Au a rai ki ligaqu i matau, ka raica, ka sa sega na tamata e via kilai au: Sa yali vei au nai drodro; sa sega na tamata e lomana na yaloqu.

⁵ Au a tagi vei kemuni Jiova: Au a kaya, Oi kemuni na noqu i drodro, Na noqu i votavota e na vanua ni bula.

⁶ Mo ni vakarogoca na noqu tagi; ni'u sa vakamalumalumutaki sara: Vakabulai au maivei ira era sa vakacacani au; ni ra sa gumatua vei au.

⁷ Ni kauta tani na yaloqu mai na vale ni veivesu, me'u vakavinavinaka kina ki na yacamuni: Era na voliti au na yalododonu; Ni kemuni na cakacaka vakayalololoma vei au.