NA SAME 141 - Vakavakadewa Makawa

A masu sa ia e na gauna ni veivakacacani. A Same i Tevita.

¹ I Jiova, au sa tagi vei kemuni: mo ni kusarawa mai vei au: Mo ni vakatu daligamuni, ni'u sa tagi vei kemuni.

² Me tikotiko ga e matamuni na noqu masu me vaka nai madrali boi vinaka; Kei na noqu dodoka na ligaqu me vaka nai madrali ni vakayakavi.

³ Mo ni lesia, Jiova, nai vakatawa ki na gusuqu; Mo ni vakaraica na katuba ni tebenigusuqu.

⁴ Me kakua ni goleva na ka ca na lomaqu, Me kitaka nai valavala ca Kei ira na tamata daucaka ca: Ia me'u kakua ni kania na kedra ka kamikamica.

⁵ Me yaviti au ko koya na yalododonu e na yalololoma; Ia me vunauci au ko koya: ena vaka na waiwai talei ki na uluqu, Ena sega ni bureitaka na uluqu; Ia ka'u na masu ga ni ra sa ia tiko na ca.

⁶ Ni sa bale e na vanua veivatu ko ira na nodra turaga ni lewa; Era na rogoca na noqu vosa: ni ra sa kamikamica.

⁷ Me vaka e dua sa cukicuki ka sa tu na qele qa e na dela ni soso, Sa veibiuyaki vakakina na suidra ki na gusu ni bulubulu.

⁸ Ia sa rai vei kemuni ga, Jiova na Turaga, na mataqu: Au sa vakararavi vei kemuni; kakua ni laiva wale tu na yaloqu.

⁹ Ni maroroi au mai na dai era birika vei au, Kei na nodra i cori nai valavala ca.

¹⁰ Me ra bale ko ira nai valavala ca ki na nodra lawa, Ka me'u sa dro bula duadua koi au.