NA SAME 140 - Vakavakadewa Makawa

A masu sa ia e na gauna ni veivakacacani. Vua na Domo-ni-sere. A Same i Tevita.

¹ Mo ni vakabulai au, Jiova, mai na tamata ca; Mo ni maroroi au mai na tamata loma kaukauwa;

² Era sa nanuma ca tiko e lomadra: Era dausoqoni vata me ia nai valu.

³ Era sa vagatara na yamedra me vaka na gata; Na weli gaga ni gata daukata sa tiko e na tebenigusudra. Sela.

⁴ Mo ni maroroi au, Jiova, mai na liga ni valavala ca; Mo ni vakabulai au mai vua na tamata loma kaukauwa; O koya sa via vukica na noqu i lakolako.

⁵ O ira na viavialevu era sa birika lo na dai me rawai au, kei na dali; Era sa tevuka na lawa e na bati ni sala; Era sa birika na dai me rawai au. Sela.

⁶ Au a kaya vei Jiova, Oi kemuni na noqu Kalou: Mo ni vakatu daligamuni Jiova, ki na domo ni noqu masu.

⁷ I Jiova na Turaga, na kaukauwa ka'u sa bula kina, Ko ni a vakaruruga na uluqu e na siga ni valu.

⁸ Kakua ni solia, Jiova, na ka era gadreva nai valavala ca: Kakua ni vakayacora na nona vere ca; de ra vakalevulevui ira kina. Sela.

⁹ Ia ko ira sa liu vei ira era sa vakalati au, Ena ubi ira na ca e vosataka na tebenigusudra.

¹⁰ Ena tauci ira na qilaiso sa waqa tu; Era na biu ki na bukawaqa: Ki nai keli titobu, me ra kakua ni cabe cake tale.

¹¹ Ena sega ni tiko dei e vuravura na tamata dauvosalevu: Ena vakasavi koya ga na ka ca me mani rusa kina, na tamata loma kaukauwa.

¹² Au sa kila ni na lewa vakadodonu ko Jiova e na vukuna sa vakararawataki, E na vukuna talega na dravudravua.

¹³ Sa dina era na vakavinavinaka ki na yacamuni ko ira na yalododonu: Ena tiko ga e matamuni ko ira nai valavala dodonu.