NA SAME 139 - Vakavakadewa Makawa

Sa lewa deivaka na Kalou, o koya e kila na ka kecega, 1-16 sa ka levu sara na nona loloma, 17,18. Sa vakararavi kina vua, a sa masu me yalodina, 19-24. Vua na Domo-ni-sere. A Same i Tevita.

¹ I Jiova, ko ni sa dikevi au, ka kilai au.

² O ni sa kila na noqu tiko sobu kei na noqu tu cake, O ni sa kila na nanuma ni lomaqu ni sa yawa tiko.

³ O ni sa vakatovolea na noqu i lakolako kei na noqu i kotokoto, A sa kila deivaka na noqu i valavala kecega.

⁴ Ni sa sega e dua na vosa e na gusuqu, Sa sega ni kilai deivaki kece sara ga vei kemuni Jiova.

⁵ O ni sa vakalati au ki muri, ki liu talega, Ka sa tabaki au e na ligamuni.

⁶ A vuku vakakoya sa dredre sara vei au ni sa veivakurabuitaki; Sa cecere, au sa sega ni rawata.

⁷ Me'u lako tani kivei me'u yali kina mai na yalomuni? Se me'u dro kivei me'u kakua ni tiko e matamuni?

⁸ Kevaka ka'u cabe ki lomalagi, ko ni sa tiko maikina: Kevaka ka'u vakarautaka na noqu i mocemoce mai bulu, raica, ko ni sa tiko maikina.

⁹ Kevaka ka'u sa taura na taba ni mataka, Ka la'ki tiko mai na sauka ni wasawasa;

¹⁰ Ena tuberi au ga maikea na ligamuni, Ka tauri au na ligamuni matau.

¹¹ Kevaka ka'u sa kaya, Io, me tabonaki au mada ga na butobuto; Sa na qai rarama sara vei au na bogi;

¹² Io, na butobuto sa sega ni vunitaki kina e dua na ka vei kemuni; Sa cila na bogi me vaka na siga: Sa tautauvata vei kemuni na butobuto kei na rarama.

¹³ Ni kemuni a bulia na noqu i ivi: Ko ni a ubi au e na kete i tinaqu.

¹⁴ Au na vakavinavinaka vei kemuni; ni sa ka rerevaki ka vakurabui na noqu i bulibuli: A ka veivakurabuitaki na nomuni cakacaka: A ka oqo sa kila vakavinaka na yaloqu.

¹⁵ Sa sega ni vuni vei kemuni na suiqu, Ni'u a caka vakavuni, Ni'u a vakamataitaki eruku i vuravura.

¹⁶ Ni'u sa vaka na vulovulo wale sa kunei au na matamuni, Ia sa volai kece sara na tikiqu e na nomuni vola, Me caka tiko e na veisiga, Ni sa sega ni caka oti e dua.

¹⁷ Sa ka talei vei au na nanuma ni lomamuni na Kalou! A ka levu na kenai wiliwili!

¹⁸ Ke'u sa via wilika, ke sa ka levu ka lailai na mata ni nuku: Ni ka'u sa yadra, edaru sa tiko vata ga.

¹⁹ Kemuni na Kalou, e dina ko ni na vakamatei ira nai valavala ca! O koya dou lako tani kina vei au, na tamata liga ca.

²⁰ Ni ra sa vosavakacacataki kemuni A ra sa cavuta walega na yacamuni ko ira na nomuni meca.

²¹ Au sa sega beka ni cati ira era sa cati kemuni Jiova? Au sa sega li ni vakasisilataki ira era sa tu me veimecaki kei kemuni?

²² Au sa cati ira vakaidina sara: Era sa noqu meca.

²³ Mo ni dikevi au, na Kalou, mo ni kila na lomaqu: Mo ni vakatovolei au, ka kila na nanuma ni lomaqu:

²⁴ Ka raica se sa dua nai tovo ca vei au, Ka tuberi au e na sala ni bula tawa mudu.