NA SAME 137 - Vakavakadewa Makawa

Era nanumi Jerusalemi ko ira na Juta ni ra sa bobula, 1-6. Sa tukuni na kena rusa ko Itomi kei Papiloni, 7-9.

¹ Mai na uciwai mai Papiloni, Eda a tiko sobu; io, eda a tagi, Ni da a nanumi Saioni.

² Eda a vakarubeca na noda api e na wilou e na kena maliwa.

³ Ia ko ira maikea era a kauti keda vakabobula, era sa kerei keda me da ia na sere; Kei ira era sa vakacacani keda era sa kerea me da vakamarautaki ira, ka ra sa kaya, Dou seretaka vei keimami e dua na sere vaka-Saioni.

⁴ Eda na seretaka vakacava na sere i Jiova E na nodra vanua na kai tani?

⁵ Kevaka ka'u sa guilecavi iko, Jerusalemi, Me qai guilecava na kena vuku na ligaqu i matau.

⁶ Kevaka ka'u sa sega ni nanumi iko, Me qai kabita sara na loma ni gusuqu e cake na yamequ; Kevaka ka'u sa sega ni rekitaki Jerusalemi vakalevu Ka vakalailai na ka kecega ka'u sa daurekitaka.

⁷ Mo ni nanumi ira Jiova, na luve i Itomi E na siga i Jerusalemi; O ira era kaya, Dou vukica, dou vukica, Ia kei na kena yavu.

⁸ O iko, na goneyalewa ni Papiloni, sa lewai me vakarusai; Sa na kalougata ko koya sa cakava vei iko Me vaka ko a cakava vei keimami:

⁹ Sa na kalougata ko koya sa taura na nomu gone lalai Ka viritaka ki na vatu.