NA SAME 135 - Vakavakadewa Makawa

Sa vakarota vei ira na tamata i Jiova me ra vakavinavinaka vua ni sa nodra Kalou ko koya sa dauvakabulai ira, ka sa daucudruvi ira na nodra meca. Dou ia vei Jiova na vakavinavinaka.

¹ Dou ia ki na yaca i Jiova na vakavinavinaka; Dou ia na vakavinavinaka, oi kemudou na tamata i Jiova.

² Oi kemudou sa tiko e na vale i Jiova, E na lomanibai ni vale ni noda Kalou.

³ Dou ia na vakavinavinaka vei Jiova; ni sa yalovinaka ko Jiova; Dou seretaka na yacana: ni sa ka vinaka.

⁴ Ni sa digitaki ira na Jekope ko Jiova me nona, Io na Isireli me nonai yau talei.

⁵ Ni'u sa kila sa levu ko Jiova, Io na noda Turaga sa uasivi vei ira kecega na kalou.

⁶ A ka kecega sa vinakata ko Jiova, sa cakava ga, Mai lomalagi, kei vuravura, e na wasawasa, kei na wai titobu kecega.

⁷ Sa vakuvuya cake na kabukabu mai nai yalayala kei vuravura; Sa cakava na livaliva me tau kina na uca; Sa kauta mai na cagi mai na nona lololo.

⁸ O koya ka vakamatea na ulumatua mai Ijipita, Na tamata kei na manumanu talega.

⁹ Ka sa tala nai vakatakilakila kei na ka vakurabui e na nomu loma ni vanua Ijipita, Vei Fero, kei ira na nona tamata kece.

¹⁰ O koya ka mokuta na veimatanitu lelevu, Ka vakamatei ira na tui kaukauwa;

¹¹ Ko Sioni na nodra tui na Amoraiti, Kei Oki na tui Pasani, Kei na veimatanitu kecega mai Kenani:

¹² Ka sa solia na nodra vanua mei votavota, Me nodra i votavota na nona tamata na Isireli.

¹³ A yacamuni, Jiova, sa na sega ni oti; Io na kemuni vakananumi, Jiova, ki nai tabatamata kecega.

¹⁴ Ni na lewai ira na nona tamata ko Jiova, Ena veivutuni talega e na vukudra na nona tamata.

¹⁵ A nodra matakau na veimatanitu na siliva kei na koula, Na cakacaka ni liga ni tamata.

¹⁶ Era sa vakagusuna, ka ra sa sega ni vosa rawa; Era sa vakamatana, ka ra sa sega ni rai rawa;

¹⁷ Era sa vakadaligana, ka ra sa sega ni rogo rawa; Ka sa sega nai cegu e na gusudra.

¹⁸ O ira era sa cakava era na tautauvata kei ira; O ira kece talega era sa vakararavi vei ira.

¹⁹ Dou vakavinavinaka vei Jiova, na mataqali i Isireli: Dou vakavinavinaka vei Jiova, na mataqali i Eroni:

²⁰ Dou vakavinavinaka vei Jiova, na mataqali i Livai; Oi kemudou sa rerevaki Jiova, dou vakavinavinaka vei Jiova.

²¹ Me vakavinavinakataki ko Jiova mai Saioni, O koya sa tiko mai Jerusalemi. Dou ia vei Jiova na vakavinavinaka.