NA SAME 132 - Vakavakadewa Makawa

Sa tukuna ko Tevita na nona nanuma na kato ni veiyalayalati, 1-7; sa masu ni sa kau, 8-10. A vosa ni yalayala ni Turaga, 11-18. A Same ni cabecabe.

¹ I Jiova, mo ni nanuma e na vuku i Tevita Na nona rarawa kecega:

² Ni sa bubului vei Jiova ko koya, Ka ia na veiyalayalati kei Koya na Kaukauwa i Jekope, ka kaya,

³ Au na sega mada ni curu ki na vale laca ka'u sa tiko kina, Se cabe ki na noqu i mocemoce;

⁴ Au na sega ni solia na mataqu me'u moce, Se na dakudaku-ni-mataqu me sosovu;

⁵ Ia ka'u na kunea mada eliu e dua na yasana me nei Jiova, Io e dua nai tikotiko me nei Koya na Kaukauwa i Jekope.

⁶ Raica, eda a rogoca ni sa tiko mai Efiraca: Eda a kunea e na dua na were mai veikau.

⁷ Eda na curuma na nona vale; Eda na cuva ki nai tutu-ni-yavana.

⁸ Mo ni cabe cake, Jiova, ki na nomuni vakavakacegu; Oi kemuni kei na kato ni nomuni kaukauwa:

⁹ Me ra vakaisulu e na yalododonu ko ira na nomuni bete; Ka kaikaila e na reki ko ira na nomuni tamata yalosavasava.

¹⁰ E na vukuna na nomuni tamata ko Tevita; Me kakua ni gole tani na matamuni maivua ko ni a lumuta.

¹¹ Sa bubului vakaidina ko Jiova vei Tevita; Ena sega ni lesu tani maikina; Maivei ira na vua ni yagomu ka'u na vakatikora na kemui sosomi e na nomu i tikotiko vakaturaga:

¹² Kevaka era na vakabauta na noqu veiyalayalati ko ira na luvemu, Kei na noqu vunau ka'u na vakatavulica vei ira, Ena tiko talega ko ira na luvedra ka sega ni mudu e na nomu i tikotiko vakaturaga.

¹³ Ni sa digitaki Saioni ko Jiova; Sa vinakata ko koya me nonai tikotiko.

¹⁴ Oqo na noqu i vakavakacegu ka sega ni mudu: Au na tiko ga eke: ni'u sa vinakata.

¹⁵ Au na vakalougatataka vakalevu na kena kakana: Au na vakamamautaki ira na nona dravudravua, e na madrai.

¹⁶ Au na vakaisulutaki ira talega na nona bete e na bula: Era na kaikaila talega e na reki na nona tamata yalosavasava.

¹⁷ Au na cakava me kubu maikina nai leu i Tevita: Au sa vakarautaka na cina me nei koya ka'u sa lumuta.

¹⁸ Au na vakaisulutaki ira na nona meca e na madua: Ia ena serau tu e na uluna na nonai sala.