NA SAME 13 - Vakavakadewa Makawa

A masu e na rarawa. Vua na Domo-ni-sere. A Same i Tevita.

¹ I Jiova, sa vakaevei na kena dede na nomuni guilecavi au? ena tawa mudu beka? Ena vakaevei na kena dede na nomuni vunia na matamuni vei au?

² E vakaevei na kena dede me'u bose tiko e na vu ni yaloqu, Ni sa rarawa tiko na lomaqu e na veisiga? E vakaevei na kena dede me rawai au na noqu meca?

³ I Jiova na noqu Kalou, mo ni nanuma, ka mo ni rogoci au: Vakararamataka na mataqu, de'u moce ka mani mate sara;

⁴ De ra kaya na noqu meca, Au sa rawai koya sara: De ra reki ko ira sa vakararawataki au ni'u sa yavalati.

⁵ Ia koi au, ka'u sa vakararavi ga e na nomuni loloma; Ena reki na yaloqu ni kemuni sa ia na veivakabulai.

⁶ Au na sere vei Jiova, Ni sa caka vinaka vei au ko koya.