NA SAME 12 - Vakavakadewa Makawa

A masu sa tukuni kina ko ira era sa viavialevu Vua na Domo-ni-sere e na Seminica. A Same i Tevita.

¹ I Jiova, mo ni ia na veivakabulai, ni sa oti na tamata lotu dina: Sa yali ko ira sa lomadina maivei ira na luve ni tamata.

² Era sa cavuta tiko ko ira yadua na ka wale vua na nonai tokani: Era sa vosa vakaveicavilaki tiko ka ra dauveivakaisini.

³ Ena seledrutia ko Jiova na tebenigusudra na dauveicavilaki, Kei na yamedra na dauvosalevu.

⁴ O ira era sa kaya, Keitou na gumatua e na yame i keitou: Sa neitou ga na tebenigusu i keitou: ko cei sa turaga vei keitou?

⁵ Ni ra sa vakararawataki na tamata malumalumu, ka ni ra sa vutugu tiko na tamata dravudravua, Sa kaya ko Jiova, Au na qai tu cake; Au na vakabulai ira yadua maivei koya sa dauvakalialiai ira.

⁶ A vosa savasava na vosa i Jiova: Me vaka na siliva sa vakatovolei e na kuro qele, Sa vakasavasavataki vakavitu.

⁷ I Jiova, ko ni na maroroi ira Kemuni na maroroi ira e nai tabatamata oqo ka sega ni mudu.

⁸ Era sa daulako voli e na veiyasana kecega na tamata ca, Ni ra sa vakalevulevui na tamata velavela sara.