NA SAME 118 - Vakavakadewa Makawa

Me ia na vakavinavinaka vua na Kalou e na vuku ni nona loloma, 1-4. A ka vinaka na vakararavi vei Jiova, 5-18. Sa tukuni na nona lako mai ko Jisu, kei na nona matanitu, 19-29.

¹ Dou vakavinavinaka vei Jiova; ni sa yalovinaka: Ni sa sega ni mudu na nona loloma.

² Me kaya ga ko ira na Isireli, Ni sa sega ni mudu na nona loloma.

³ Me kaya ga na kawa i Eroni, Ni sa sega ni mudu na nona loloma.

⁴ Me ra kaya ko ira era rerevaki Jiova, Ni sa sega ni mudu na nona loloma.

⁵ Au a masuti Jiova ni ka'u a rarawa: A sa rogoci au ko Jiova, ka sa vakalalagataki au.

⁶ Sa totaki au ko Jiova; ka'u na sega ni rere: A cava beka me ra kitaka vei au ko ira na tamata?

⁷ Sa totaki au ko Jiova kei ira era vukei au: O koya ka'u na raica ni ra ca ko ira era sa cati au.

⁸ Sa vinaka na vakararavi vei Jiova Ka ca na vakararavi vei ira na tamata.

⁹ Sa vinaka na vakararavi vei Jiova Ka ca na vakararavi vei ira na turaga.

¹⁰ Era vakavolivoliti au na lewe ni veivanua: Ia e na yaca i Jiova ka'u na vakarusai ira.

¹¹ Era vakavolivoliti au; io era sa voliti au: Ia e na yaca i Jiova ka'u na vakarusai ira.

¹² Era sa vakavolivoliti au me vaka na qele ni pi; era sa bokoci me vaka na bukawaqa dolou: Ia e na yaca i Jiova ka'u na vakarusai ira.

¹³ O sa biliraki au vakaukauwa me'u bale kina: Ia sa vukei au ko Jiova.

¹⁴ Sa noqu kaukauwa kei na vu ni noqu sere ko Jiova, Ka sa yaco me noqu i vakabula.

¹⁵ A domo ni reki kei na veivakabulai sa tiko e nodra veivale na yalododonu: Sa gumatua na liga i matau i Jiova.

¹⁶ A liga i matau i Jiova sa cecere: A liga i matau i Jiova sa gumatua.

¹⁷ Au na sega ni mate, au na bula ga, Ka tukuna tiko na cakacaka i Jiova.

¹⁸ Sa vakanakuitataki au vakalevu ko Jiova: Ia sa sega ni laivi au me'u mate.

¹⁹ Dou dolava vei au na matamata-ni-koro ni yalododonu: Au na curu kina, ka ia na vakavinavinaka vei Jiova:

²⁰ Oqo na matamata-ni-koro i Jiova, Era na daucuru kina na yalododonu.

²¹ Au na vakavinavinaka vei kemuni ni kemuni a vakarorogo vei au, Ka sa yaco me noqu i vakabula.

²² A vatu era sa cata ko ira na matai ni vale Sa yaco me kenai vakadei e na tutu ni vale.

²³ Oqo na cakacaka i Jiova: A sa ka e veivakurabuitaki e na matada.

²⁴ Oqo na siga sa lesia ko Jiova; Eda na reki ka marau kina.

²⁵ Au masuti kemuni Jiova, mo ni ia sara na veivakabulai: Au masuti kemuni Jiova, mo ni ia sara na veivakalougatataki.

²⁶ Sa kalougata ko koya sa lako mai e na yaca i Jiova: Keimami sa vakalougatataki kemudou mai na vale i Jiova.

²⁷ Sa Kalou ko Jiova, o koya sa vakararamataki keda: Dou vauca nai soro e na dali ki na tutuna balavu cake ni cabocabo-ni-soro.

²⁸ Kemuni na noqu Kalou, ka'u na vakavinavinaka vei kemuni, Oi kemuni na noqu Kalou, ka'u na vakacaucautaki kemuni.

²⁹ Dou ia na vakavinavinaka vei Jiova; ni sa yalovinaka: Ni sa sega ni mudu na nona loloma.