NA SAME 116 - Vakavakadewa Makawa

Sa tukuni na nona loloma kei na nona talairawarawa vua na Turaga ni sa vakabulai, 1-11; ka sa nanuma na vakavinavinaka, 12-19.

¹ Au sa lomani Jiova, ni sa rogoca ko koya Na domo ni noqu masu.

² Ni sa vakalakala daligana vei au, Ka'u na masu tiko kina vua ni ka'u sa bula.

³ Sa viviraki au nai vau ni mate, Ka sa kidaci au na rarawa ni bulubulu: Sa yacovi au na rarawa kei na ocaoca.

⁴ Au a qai masuta na yaca i Jiova; I Jiova, au masuti kemuni mo ni vakabula na yaloqu.

⁵ Sa daulomasoli ko Jiova, ka yalododonu; Io, sa yalololoma na noda Kalou.

⁶ Sa maroroi ira era sega ni vuku ko Jiova: Au a vakamalumalumutaki, a sa vakabulai au ko koya.

⁷ Mo lesu tale ki na nomu i vakavakacegu, na yaloqu: Ni sa caka vinaka sara vei iko ko Jiova.

⁸ Kemuni sa vakabula na yaloqu mai na mate, Kei na mataqu mai na wai ni mata, Kei na yavaqu me'u kakua ni bale.

⁹ Au na lako voli e na mata i Jiova E na vanua ni bula.

¹⁰ Au a vakabauta, o koya ka'u a vosa kina: Au a rarawa vakalevu:

¹¹ Au a kaya ni'u a taqaya, Era daulasulasu na tamata kecega.

¹² A cava me'u cakava vei Jiova E na vuku ni nona cakacaka loloma kecega vei au?

¹³ Au na taura na bilo ni bula, Ka masuta na yaca i Jiova.

¹⁴ Au na cakava mada na ka ka'u a bubului kina vei Jiova Io e matadra na nona tamata kecega.

¹⁵ A ka talei e na mata i Jiova Na nodra mate na nona tamata yalosavasava.

¹⁶ I Jiova, e dina ka'u sa nomuni tamata; Au sa nomuni tamata, kei na luvena na nomuni vada: O ni sa sereka na noqu i vesu.

¹⁷ Au na vakacabora vei kemuni nai madrali ni vakavinavinaka, Ka'u na masuta na yaca i Jiova.

¹⁸ Au na cakava mada na ka ka'u a bubului kina vei Jiova Io e matadra na nona tamata kecega,

¹⁹ E na lomanibai ni vale i Jiova, E na nomu loma ni koro, Jerusalemi. Dou ia vei Jiova na vakavinavinaka.