NA SAME 115 - Vakavakadewa Makawa

Sa lewa na Kalou, 1-3, ka sa ka wale na matakau, 4-8, o koya oqo me da vakararavi kina vua na Kalou, 9-11, ka vakavinavinaka, 12-18.

¹ Kemuni Jiova, me kakua vei keimami, me kakua vei keimami, Me ia ki na yacamuni ga na vakavinavinaka, E na vuku ni nomuni loloma, kei na nomuni yalodina.

² E na cava me ra kaya na veimatanitu, Sa evei na nodra Kalou?

³ Ia na noda Kalou sa tiko mai lomalagi: Sa cakava oti na ka kecega sa vinakata ko koya.

⁴ Ia na nodra matakau na siliva kei na koula, Na cakacaka ni liga ni tamata.

⁵ Era sa vakagusuna, ia era sa sega ni vosa rawa; Era sa vakamatana, ia era sa sega ni rai rawa;

⁶ Era sa vakadaligana, ia era sa sega ni rogo rawa: Era sa vakaucuna, ia era sa sega ni boi rawa;

⁷ Era sa vakaligana, ia era sa sega ni tara ka rawa; Era sa vakayavana, ia era sega ni lako rawa: Ka ra sa sega talega ni cavuta rawa na vosa e na nodra i tagitagi.

⁸ O ira era cakava era sa tautauvata kei ira; Kei ira kece talega era sa vakararavi vei ira.

⁹ I Isireli, mo vakararavi vei Jiova: O koya ga na nodra i vukevuke kei na nodra i sasabai.

¹⁰ Na mataqali i Eroni, dou vakararavi vei Jiova: O koya ga na nodra i vukevuke kei na nodra i sasabai.

¹¹ Oi kemudou sa rerevaki Jiova, dou vakararavi vei Jiova: O koya ga na nodra i vukevuke kei na nodra i sasabai.

¹² Sa daunanumi keda ko Jiova: ena vakalougatataki keda: Ena vakalougatataka na mataqali i Isireli; Ena vakalougatataka na mataqali i Eroni.

¹³ Ena vakalougatataki ira era sa rerevaki Jiova, Ko ira na lalai kei ira na lelevu.

¹⁴ Ena vakalewevuqataki kemudou tiko ko Jiova, Oi kemudou kei ira na luvemudou.

¹⁵ Sa vakalougatataki kemudou ko Jiova O koya ka bulia na lomalagi kei vuravura.

¹⁶ Na lomalagi io na lomalagi sa nei Jiova: Ia sa solia na vuravura ko koya me nodra na luve ni tamata.

¹⁷ Era sa sega ni vakavinavinaka rawa vei Jiova ko ira na mate, Se ko ira era lako sobu ki na vanua era galu kina.

¹⁸ Ia koi keda ga, eda na vakavinavinaka vei Jiova Mai na gauna oqo ka sega ni mudu. Dou ia vei Jiova na vakavinavinaka.