NA SAME 112 - Vakavakadewa Makawa

E yaga na lotu e na bula oqo, 1-3, kei na bula maimuri, 4-9. Era na kunea ko ira na tamata ca, 10.

¹ Dou vakavinavinaka vei Jiova. Sa kalougata na tamata sa rerevaki Jiova, O koya sa rekitaka vakalevu na nona vunau.

² Ena kaukauwa e vuravura na nona kawa: Era na kalougata na nodra mataqali na yalododonu.

³ Ai yaya kei nai yau ena tu ga e nona vale: Ia na nona cakacaka dodonu ena sega ni oti.

⁴ Sa cadra na rarama e na butobuto vei ira na yalododonu: Sa daulomasoli ko koya, ka yalololoma, ka daucaka dodonu.

⁵ Sa tamata yaco ko koya sa dauyalololoma, ka dausoli ka: Ena daulewa vakayalomatua na nona ka:

⁶ Ni na sega ni yavavala e na dua na gauna: Ena sa nanumi tikoga ka tawa mudu na tamata dodonu.

⁷ Ena sega ni rerevaka nai rogorogo ca: Sa dei na lomana, ni sa vakararavi tiko vei Jiova.

⁸ Sa dei na lomana, ena sega ni rere, Ena raica mada ni ra bale na nona meca.

⁹ Sa duibiubiuta ko koya, sa dausoli ka vei ira na dravudravua; Sa sega ni mudu na nona cakacaka dodonu; Ena vue na nona totoka ka na dokai.

¹⁰ Ena raica ko koya na tamata ca, ka na cudru kina; Ena vakasequruquru bati, ka na waicala yani ko koya: Na ka era gadreva nai valavala ca ena sega ni yaco.