NA SAME 111 - Vakavakadewa Makawa

Me vakavinavinaka vua na Kalou sa vakaiukuuku ka dauloloma, 1-9. Sa tubu na vuku e na rere, 10.

¹ Dou ia vei Jiova na vakavinavinaka. Au na vakavinavinaka vei Jiova e na yaloqu taucoko, E na nodra bose na yalododonu, kei nai soqosoqo lewe ni lotu.

² A cakacaka i Jiova sa ka levu, Era qara me ra kila ko ira kecega era dauvinakata.

³ A ka vakaturaga ka vakaiukuuku na nona cakacaka; Ka sa sega ni mudu na nona yalododonu.

⁴ Sa cakava me nanumi na nona cakacaka mana: Sa daulomasoli ko Jiova ka yalololoma.

⁵ Sa solia na kedra vei ira era sa rerevaki koya: Ena nanuma tikoga na nona veiyalayalati.

⁶ Sa vakatakila oti na kaukauwa ni nona cakacaka vei ira na nona tamata, Ni sa solia vei ira me nodra i votavota na veimatanitu.

⁷ Sa dina ka dodonu na cakacaka ni ligana; Sa vakadinadinataki na nonai vakaro kecega.

⁸ Sa vakataudeitaki me sega ni mudu, Ka sa caka e na yalodina kei na yalododonu.

⁹ Sa vakayacora na bula ko koya vei ira na nona tamata: Sa lesia na nona veiyalayalati me sega ni mudu: Sa ka savasava ka rerevaki na yacana.

¹⁰ Na rerevaki Jiova sa kenai vakatekivu ni vuku: Era sa yalomatua kecega ko ira era sa cakava na nona vunau: Sa na sega ni mudu na nona vakavinavinakataki.