NA SAME 110 - Vakavakadewa Makawa

A matanitu, 1-3, kei na cakacaka vakabete, 4, kei na qaqa, 5,6, kei na rarawa i Karisito, 7. A Same i Tevita.

¹ Sa kaya ko Jiova vua na noqu Turaga, Mo tiko e ligaqu i matau, Me'u vakamalumalumutaki ira mada na nomu meca mei tutu-ni-yavamu.

² Ena dodoka ko Jiova nai titoko ni nomuni kaukauwa mai Saioni: Mo ni lewa e na kedra maliwa na nomuni meca.

³ O ira na nomuni tamata era na via vakacabori ira mei madrali E nai ukuuku ni yalosavasava e na siga ni nomuni kaukauwa; Era na lewe vuqa na nomuni cauravou ka lailai na mata ni tegu mai na kete ni mataka.

⁴ Sa bubului oti ko Jiova, ka na sega ni veivutuni, O iko na bete tawa mudu me vaka nai lesilesi i Melikiseteki.

⁵ O koya na Turaga, ka tiko mai na ligamuni matau, Ena laubasikataki ira na tui e na siga ni nona cudru.

⁶ Ena lewa na veimatanitu ko koya, Ena vakaosoya na veitikina e na yagodra era sa moku; Ena vuetaka na nodra tui na vanua e vuqa.

⁷ Ena gunu mai na wai drodro e na sala: Ena ta cake tale kina ko koya.