NA SAME 109 - Vakavakadewa Makawa

Sa tukuna na nona meca, ko Tevita 1-20; ka masu vua na Turaga, 21-31. Vua na Domo-ni-sere. A Same i Tevita.

¹ Mo ni kakua ni galu, na Kalou ka'u dauvakavinavinaka kina;

² Ni ra sa dalaga vei au ko ira nai valavala ca kei ira na dauveivakaisini: Era sa vosataki au e na yame lasulasu.

³ Era sa vakavolivoliti au e na vosa ni veicati; Ka veivala kei au ka sega na vuna.

⁴ Era sa meca vei au me kenai sau ni noqu loloma: Ia koi au, ka'u daumasu ga.

⁵ Era sa caka ca vei au mei sau ni ka vinaka, Ka ra cati au mei sau ni noqu loloma.

⁶ Mo ni lesia na tamata ca me lewai koya: Ia me tu mai na ligana i matau ko Setani.

⁷ Ni sa lewai ko koya, me vakacalai ga; Ia me wili na nona masu me ka ca ga.

⁸ Me kakua ni vuqa na nona siga; Ia me dua tani me taura na nonai lesilesi.

⁹ Me ra kakua ni vakatamani ko ira na luvena, Me sa yada talega na watina.

¹⁰ Me ra luveniyali voli na luvena ka vosai kedra: Me ra qara kedra mai na nodra vanua dausiga.

¹¹ Me kauta tani na nona ka kecega na dauvakasaurara; Ka me ra betiraka na nona cakacaka na kai tani.

¹² Me kakua e dua me yalololoma vua: Ia me kakua e dua me lomana na luvena sa luveniyali.

¹³ Me ra kawaboko na nona kawa; Io e nai tabatamata emuri me bokoci laivi na yacadra.

¹⁴ Me nanuma ko Jiova na nodra caka cala na tamana; Ia me kakua ni bokoci nai valavala ca i tinana.

¹⁵ Me ra tu ga e na mata i Jiova e na veisiga, Me muduka tani ko koya e vuravura na ka era nanumi kina.

¹⁶ Ni sa sega ni nanuma ko koya me ia na cakacaka loloma, Ia sa vakacacana ga na tamata sa rarawa ka dravudravua, Me vakamatea na tamata sa ramusu na yalona.

¹⁷ Ni sa vinakata na veivatonaki ko koya, sa yaco ga vua; Ni sa sega ni vinakata na vosa vinaka, me yawa sara vakakina vua.

¹⁸ Ni sa vakasulumi koya e na veivatonaki me vaka e nai sulu, Me curuma na ketena me vaka na wai, Kei na suina talega me vaka na waiwai.

¹⁹ Me tutuvitaki kina me vaka e nai sulu sa tutuvi kina, Kei nai vau ni sulu sa vauci tiko kina ko koya.

²⁰ Me sauma vakaoqo na noqu meca ko Jiova, Vei ira talega era sa vosacataka na yaloqu.

²¹ Ia koi kemuni Jiova na Kalou, mo ni cakacaka e na vukuqu, e na vuku ni yacamuni: Ni sa yaga na nomuni yalololoma, mo ni vakabulai au.

²² Ni'u sa malumalumu ka dravudravua Ka sa mavoa e lomaqu na yaloqu.

²³ Au sa lako yani me vaka na yaloyalo ni sa lumaluma na siga: Au sa veikauyaki me vaka na vodre.

²⁴ Sa malumalumu na duruqu e na daulolo: Ka sa lutu sobu na yagoqu.

²⁵ Era sa vosacataki au talega ko ira: Ni ra raici au era kurea na uludra.

²⁶ Mo ni vukei au, Jiova na noqu Kalou; Mo ni vakabulai au me vaka na nomuni yalololoma:

²⁷ Me ra kila ni sa ligamuni ga oqo; Ni sai kemuni Jiova, ka cakava.

²⁸ Me ra ia na veivatonaki ko ira, ia mo ni vosa vinaka ga: Ni ra tu cake, me ra vakamaduataki; ia me reki ga na nomuni tamata.

²⁹ Me ra vakaisulutaki e na madua ko ira na noqu meca, Ia me ra solei tutuvi e na ka era madua kina me vaka e nai sulu.

³⁰ Au na vakavinavinaka vakalevu vei Jiova e na gusuqu; Io, ka'u na vakavinavinaka vua e na kedra maliwa na lewe vuqa.

³¹ Ni na tu ko koya mai na liga i matau ni tamata dravudravua, Me vakabulai koya maivei ira era sa vakalewai koya.