NA SAME 108 - Vakavakadewa Makawa

Sa vakavinavinaka ko Tevita, ka sa masulaki koya kei na nona vanua. A Same i Tevita.

¹ Kemuni na Kalou, sa dei na yaloqu; Au na sere ka vakavinavinaka, ia ka'u na vakaiukuukutaka.

² Drau yadra mai, na soliteri kei na api: Ia koi au ka'u na souta e na mataka.

³ Au na vakavinavinaka vei kemuni Jiova, e na veimatanitu: Au na sere vei kemuni e na kedra maliwa na veimataqali:

⁴ Ni sa sivia na lomalagi na kena levu ni nomuni loloma: Ka sa yacova na o na nomuni dina.

⁵ Mo ni cecere, na Kalou, ka me lolovira ko lomalagi: Kei na nomuni lagilagi ki vuravura taucoko;

⁶ Me vakabulai kina ko koya ko ni sa lomana, Mo ni vakabulai au e na ligamuni matau, ka rogoci au.

⁷ Sa vosa oti na Kalou e na nona yalosavasava; au na rekitaka; Au na votai Sikemi, ka vakarauta na buca mai Sukoci.

⁸ Sa noqu ko Kiliati; sa noqu ko Manasa; Ai vakaruru ni uluqu ko Ifireimi; A noqu tamata daulewa ko Juta;

⁹ A noqu i vuivui ko Moapi; Ka'u na viritaka ki Itomi na noqu i vava: Ka'u na kailataki Filisitia.

¹⁰ O cei ena kauti au ki na koro kaukauwa? O cei ena tuberi au ki Itomi?

¹¹ Oi kemuni na Kalou, se segai, oi kemuni ka sa biuti keimami? Ia koi kemuni na Kalou, ko ni sa sega ni lako vata kei na neimami valu?

¹² Mo ni vukei keimami mai na ka rarawa: Ni sa sega ni yaga na nodra veivuke na tamata.

¹³ E na vuku ni Kalou eda na gugumatua: Ni sai koya ga ena buturaka sobu na noda meca.