NA SAME 107 - Vakavakadewa Makawa

Me ra vakavinavinaka vua na Turaga ni sa lewai ira vakavinaka na nona tamata, 1-3, ni ra veilakoyaki, 4-9; ni ra sa bobula, 10-16; ni ra sa tauvi mate, 17-22; ni ra sa soko, 23-32; ka sa solia na ka e yaga, 33-43.

¹ Dou ia vei Jiova na vakavinavinaka, ni sa yalovinaka ko koya: Ni sa sega ni mudu na nona loloma.

² Me ra kaya vakakina ko ira sa vakabulai ira oti ko Jiova, O ira sa vakabula oti ko koya mai na liga ni meca;

³ Ka sa soqoni ira vata mai na veivanua, Mai na tu-i-cake, mai ra talega, Mai na mata ni tokalau, kei na mata ni ceva.

⁴ Era a lako sese voli mai na lekutu e na sala e sega ni lakovi; Era sega ni kunea na koro me ra tiko kina.

⁵ A ra sa viakana ka viagunu, Ka sa waicala e lomadra na yalodra.

⁶ Era sa qai tagi vei Jiova e na nodra rarawa, Ka sa vakabulai ira mai na nodra rarawa.

⁷ Sa tuberi ira e na sala dodonu, Me ra lako ki na koro me ra tiko kina.

⁸ Me ra ia mada na vakavinavinaka vei Jiova e na vuku ni nona yalololoma, Kei na nona cakacaka mana vei ira na luve ni tamata!

⁹ Ni sa vakamamautaka na yalo sa daugagadre, Ka vakamamautaka na yalo e viakana e na ka vinaka.

¹⁰ O ira era sa tiko e na butobuto kei na yaloyalo ni mate, Ni ra sa vesuki e na rarawa kei na kaukamea;

¹¹ Ni ra sa talaidredre ki na vosa ni Kalou, Ka ra beca nai vakavuvuli Koya na Cecere sara:

¹² O koya sa vakamalumalumutaka kina na lomadra e na cakacaka bibi; Era bale sobu, ka sa sega e dua me vukei ira.

¹³ Era sa qai tagi vei Jiova e na nodra vakaloloma, Ka sa vakabulai ira mai na nodra rarawa.

¹⁴ Sa kauti ira tani mai na butobuto kei na yaloyalo ni mate, Ka musulaka na kedrai vesu.

¹⁵ Me ra ia mada na vakavinavinaka vei Jiova e na vuku ni nona yalololoma, Kei na nona cakacaka mana vei ira na luve ni tamata!

¹⁶ Ni sa musulaka nai sogo ni matamata-ni-koro parasa, Ka tamusuka laivi na samugakagaka aironi.

¹⁷ Na tamata lialia, e na vuku ni nodra talaidredre, Kei na nodra i valavala ca, era sa tauvi mate.

¹⁸ Sa cata na kakana kecega na lomadra; A ra sa torova na matamata-ni-koro ni mate.

¹⁹ Era sa qai tagi vei Jiova e na nodra rarawa, Ka sa vakabulai ira mai na nodra vakaloloma.

²⁰ Sa tala na nona vosa, ka vakabulai ira, Ka kauti ira tani mai na ka era rusa kina.

²¹ Me ra ia mada na vakavinavinaka vei Jiova e na vuku ni nona yalololoma, Kei na nona cakacaka mana vei ira na luve ni tamata!

²² Ia me ra cabora nai madrali ni vakamolimoli, Ka marau ni ra tukuna na nona cakacaka.

²³ O ira era sa soko voli e na wasawasa e na waqa vanua, Ka kitaka na nodra cakacaka e na wai levu;

²⁴ O ira oqo era raica na cakacaka i Jiova, Kei na nona ka e veivakurabuitaki e na wai titobu.

²⁵ Ni sa vosa ko koya, ka vakayacora mai na cava, Ka sa tubu kina na kena biau.

²⁶ Era sa lako cake ki lomalagi, era sa lako sobu vakatitobu sara; Sa waicala na lomadra e na nodra tiko vakaca.

²⁷ Era suaigelegele ka yatayata me vaka na tamata sa mateni, A ra sa leqa sara.

²⁸ Era sa qai tagi vei Jiova e na nodra rarawa, Ka sa vakabulai ira mai na nodra vakaloloma.

²⁹ Sa vakaruruya na cava, Ka sa vakamaravutaka na kena biau.

³⁰ Era sa qai marau ni ra sa vakacegu rawa; Ka sa kauti ira ko koya ki na toba era via tiko kina.

³¹ Me ra ia mada na vakavinavinaka vei Jiova e na vuku ni nona yalololoma, Kei na nona cakacaka mana vei ira na luve ni tamata!

³² Me ra vakalevulevui koya talega e na nodra i soqosoqo na tamata, Ka vakavinavinaka vua e na nodra tiko vata na qase.

³³ Sa vukica ko koya na uciwai me vanua talasiga, Kei na vanua vakavurevure wai me vanua maca sara;

³⁴ Kei na vanua bulabula me vanua dravuisiga, E na vuku ni nodra ca era tiko kina.

³⁵ Sa vukica na vanua dravuisiga me vanua vakadrano ga, Kei na vanua maca me vanua dauvakavure wai.

³⁶ Ka sa lewa me ra tiko kina ko ira era dausiga, Me ra tara kina na koro me ra tiko kina;

³⁷ Ka kaburaka na sila e na veiwere, ka tea na veiwere-ni-vaini, Me vuataka rawa na kena vuata.

³⁸ Ka sa vakalougatataki ira talega, ka ra sa vakalewevuqataki vakalevu; Ka sa sega ni vakalailaitaka na nodra manumanu.

³⁹ Ia era sa qai vakalailaitaki tale, ka vakamalumalumutaki E na veivakasaurarataki, kei na tauvi mate, kei na ka rarawa.

⁴⁰ Sa beci ira vakalevu na turaga ko koya, Ka sa vakasevi ira me ra lako sese e na vanua lala, sa sega kina na sala.

⁴¹ Sa vueta cake na dravudravua mai na ka rarawa, Ka sa cakava me vakamataqali me vaka na qele ni sipi.

⁴² Ena raica, ka reki, ko ira na yalododonu: Ia ena galu nai valavala ca kecega.

⁴³ Ko ira era sa vuku, ka vakanananu ki na ka oqo, Era na kila na yalololoma i Jiova.