NA SAME 106 - Vakavakadewa Makawa

Me ia na vakavinavinaka vua na Turaga, 1-3. Sa masu ko koya, 4,5. A nodra ca na qase eliu, kei na loloma ni Kalou, 6-46. Sa masu ka vakavinavinaka, 47,48.

¹ Dou ia vei Jiova na vakavinavinaka. Dou vakamolimoli vei Jiova; ni sa yalovinaka; Ni sa sega ni mudu na nona loloma.

² O cei sa tukuna rawa na cakacaka kaukauwa i Jiova? O cei sa vosataka rawa na nona vinaka kecega?

³ Sa kalougata ko ira era vakabauta na lewa dodonu, Kei koya sai valavala dodonu e na veigauna kecega.

⁴ Mo ni nanumi au, Jiova, e na loloma ko ni sa daulomani ira kina na nomuni tamata: Mo ni lako mai vei au ka vakabulai au;

⁵ Me'u raica na nodra vinaka na tamata ko ni sa digitaka, Me'u marau e na nodra marau na nomuni matanitu, Me'u reki vata kei ira na nomuni votavota.

⁶ Keimami sa caka cala vata kei ira na neimami qase, Keimami sa cakava na ka sa sega ni dodonu, keimami sai valavala ca.

⁷ Era a sega ni kila na nomuni cakacaka mana ko ira na neimami qase mai Ijipita; Era sega ni nanuma na kena levu ni nomuni loloma; Ka ra sa vakacudrui koya mai na wasawasa, io mai na Wasa Damudamu.

⁸ Ia ka sa vakabulai ira ga ko koya e na vuku ni yacana, Me vakatakila kina ko koya na nona kaukauwa.

⁹ Ka sa vunauca na Wasa Damudamu ko koya, a sa di mai: Ka sa tuberi ira ko koya e loma ni wai titobu, me vaka mai lekutu.

¹⁰ Ka sa vakabulai ira mai na liga i koya sa cati ira, Ia sa vakabulai ira mai na liga ni meca.

¹¹ Ka sa luvuca na nodra meca na wai: Sa sega e dua vei ira sa vo bula.

¹² Era sa qai vakabauta na nona vosa; Era seretaka vua na vakavinavinaka.

¹³ Sa sega ni dede era guilecava na nona cakacaka; Era sega ni waraka na nona vosa:

¹⁴ Ka ra garogaro vakalevu ga mai na lekutu, Ka vakatovolea vakaca na Kalou mai na veikau.

¹⁵ Ka sa solia vei ira ko koya na ka era kerea; Ia sa vakayacora na tutue e na yalodra.

¹⁶ A ra sa vuvutaki Mosese e na nodra i tikotiko, Kei Eroni na tamata yalosavasava i Jiova.

¹⁷ Sa kasei na vanua ka tilomi Tecani, Ka buluta na mataqali i Epairami.

¹⁸ Ka sa waqa mai e dua na buka e na nodra i soqosoqo; Sa vakamai ira nai valavala ca na yameyame ni bukawaqa.

¹⁹ Era sa cakava e dua na luve ni pulumokau mai Orepi, Ka ra soro ki na matakau sa vakawaicalataki ka qai buli.

²⁰ A ra sa vukica na ka ka nodra i ukuuku, Me tautauvata kei na pulumokau sa daukana co.

²¹ Ka ra guilecava na Kalou na nodra i vakabula, O koya ka kitaka na ka levu mai Ijipita;

²² Na ka mana e na vanua i Ame, Kei na ka rerevaki mai na Wasa Damudamu.

²³ Sa kaya kina ko koya ni na vakarusai ira, Kevaka sa sega ni tu e na kedra maliwa kei na Kalou ko Mosese na nona digitaki, Me vagolea tani na nona cudru, me kakua ni vakarusai ira.

²⁴ Io, era a beca na vanua sa vinakati sara. Era sega ni vakabauta na nona vosa;

²⁵ A ra sa didi e nodra veivale, Ka sega ni vakarorogo ki na vosa i Jiova.

²⁶ O koya sa dodoka kina na ligana vei ira, Me vakabalei ira mai na lekutu:

²⁷ Me vakabalea talega na nodra kawa e na veimatanitu, Ka dui vakasevi ira ki na veivanua.

²⁸ Era sa vakabauti Peali-Piori talega, Ka ra kania nai madrali vei ira na mate.

²⁹ Era sa vakararawataki koya e na nodra i valavala: Ka sa kani ira na mate dauveiveitauvi.

³⁰ Sa qai tu cake ko Finiase, ka cudruvi ira: Ka sa mudu kina na mate veiveitauvi.

³¹ Ka sa vakabau me nonai valavala dodonu, Ki nai tabatamata kecega e sega ni mudu.

³² Era sa vakacudrui koya talega mai na wai ni dauvere, A sa ca kina ko Mosese e na vukudra:

³³ Ka ni ra sa vakararawataka na yalona, Sa vosa cala kina na tebenigusuna.

³⁴ Era sa sega ni vakarusa na veimatanitu, Ka vakaroti ira kina ko Jiova:

³⁵ Ka ra sa la'ki tiko vata kei ira na lewe ni vanua, Ka vulica na nodra i valavala.

³⁶ A ra sa qarava na nodra matakau: Ka ra sa coriti kina.

³⁷ Io, era a vakacabora na luvedra tagane kei na luvedra yalewa ki na tevoro,

³⁸ Ka liviraka na dra sa sega ni cala, io na kedra dra na luvedra tagane kei na luvedra yalewa, Ni ra vakacabori ira ki na matakau ni Kenani: Ka sa vakasisila kina na vanua e na vuku ni dra.

³⁹ Era sa dukadukali vakaoqo e na nodra cakacaka, Ka lako vakatani e na nodra i valavala ca.

⁴⁰ Ka sa waqa kina na cudru i Jiova vei ira na nona tamata, Ka sa cata kina na nonai votavota.

⁴¹ Ka sa soli ira ki na ligadra na veimatanitu; Ka ra sa lewai ira ko ira era sa cati ira.

⁴² Ka sa vakasaurarataki ira talega ko ira na nodra meca, A ra sa vakamalumalumutaki vei ira.

⁴³ Sa vakabulai ira vakavuqa ko koya; Ia ko ira, era sa dauvakacudrui koya e na ka era bosea, Ka ra sa vakamalumalumutaki e na vuku ni nodra i valavala ca.

⁴⁴ Ia ka sa raica ga ko koya na nodra rarawa, Ni sa rogoca ko koya na nodra tagi:

⁴⁵ A sa nanuma e na vukudra na nona veiyalayalati, Ka sa veivutuni me vaka na kena levu ni nona yalololoma:

⁴⁶ Sa lewa talega me ra lomani Vei ira kecega era sa vakabobulataki ira.

⁴⁷ Mo ni vakabulai keimami, Jiova na neimami Kalou, Ka soqoni keimami vata maivei ira na veimatanitu, Me keimami ia kina na vakavinavinaka ki na yacamuni tabu, Ke me daureki talega e na vakavinavinaka vei kemuni.

⁴⁸ Me vakarokorokotaki ko Jiova na nodra Kalou na Isireli, Mailiu sara ka yacova na gauna ena sega ni mudu: Ia me ra vakaemeni na tamata kecega. Dou ia vei Jiova na vakavinavinaka.