NA SAME 105 - Vakavakadewa Makawa

Sa vakarota na vakavinavinaka vua na Kalou, e na vuku ni nona lewa, kei na nona cakacaka mana eliu.

¹ Dou ia na vakamolimoli vei Jiova; dou masuta na yacana: Dou tukuna voli vei ira na tamata na nona cakacaka.

² Dou sere vua, dou seretaka vua na same: Dou veitukutukunitaka na nona cakacaka mana kecega.

³ Dou vakacaucautaka na yacana tabu: Me marau na lomadra era sa qaravi Jiova.

⁴ Dou vakasaqarai Jiova, kei na nona kaukauwa: Dou vakanamata tikoga vua.

⁵ Dou nanuma na nona cakacaka e veivakurabuitaki sa cakava ko koya; Ia, na nona cakacaka mana, kei na lewa ni gusuna;

⁶ Oi kemudou na kawa i Eparaama na nona tamata, Kei na kawa i Jekope sa digitaka ko koya.

⁷ O koya ga ko Jiova na noda Kalou: Sa vakayacori na nona lewa e vuravura taucoko.

⁸ Sa daunanuma ko koya na nona veiyalayalati ka tawa mudu, Na vosa ka vakarota me yacova nai tabatamata e udolu:

⁹ Na veiyalayalati ka cakava kei Eparaama, Kei na nona bubului vei Aisake;

¹⁰ Ka sa vakadeitaka vei Jekope mei vunau, Ia vei Isireli me veiyalayalati e sega ni oti:

¹¹ Ka sa kaya, Au na solia vei iko na vanua ko Kenani, Nai yalayala ni nomu i votavota:

¹² Ni ra sa lewe lailai ga na tamata; Io, ni ra lewe lailai sara, ka vulagi kina.

¹³ Ni ra lako voli mai na dua na vanua ki na dua tani na vanua, Mai na dua na matanitu ki na dua tani na matanitu;

¹⁴ Sa sega ni laiva e dua na tamata me vakasaurarataki ira: Ia sa vunauci ira na tui e na vukudra;

¹⁵ A sa kaya ko koya, Dou kakua ni tarai ira ka'u sa lumuta, Ia dou kakua ni vakacacani ira na noqu parofita.

¹⁶ Sa lewa talega e dua na dausiga me kania na vanua: Sa muduka kecega na kakana era sa bula kina.

¹⁷ Sa tala e dua na tamata ko koya me liutaki ira; Io ko Josefa, o koya sa volitaki me bobula:

¹⁸ Era vakararawataka na yavana e nai vesu: Sa vau ko koya e na sinucodo aironi:

¹⁹ Ka sa yaco mada na siga sa vakayacori kina na nona vosa; Sa vakatovolei koya na vosa i Jiova.

²⁰ Sa talaki na tui ka sereki koya; Io ko koya sa lewai ira na matanitu sa sereki koya sara.

²¹ Sa lesi koya me turaga ni noda vale, Me lewa na nonai yau kecega:

²² Me veitalia ga ke via vesuki ira na nona tamata turaga; Ka me vakavukui ira na nona qase.

²³ Ka sa lako mai ki Ijipita ko Isireli; Ka sa tiko vulagi ko Jekope e na vanua nei Ame.

²⁴ Ka sa vakalewevuqataki ira sara na nona tamata; Ka sa vakaukauwataki ira ka sa malumalumu na nodra meca.

²⁵ Sa vukica na yalodra me ra cati ira na nona tamata. Ka me ra cakacaka vaqaseqase vei ira na nona tamata.

²⁶ Sa talai Mosese ko koya na nonai talatala; Kei Eroni ka digitaka ko koya.

²⁷ Erau a vakatakila vei ira na nonai vakadinadina, Kei na ka mana e na vanua nei Ame.

²⁸ Sa tala ko koya na butobuto ka vakabutobutotaka; Ka ra sa sega ni talaidredre ki na nona vosa.

²⁹ Sa vukica na nodra wai me dra, Ka vakamatea na nodra ika.

³⁰ Sa vakatubura vakalevu na boto na nodra vanua, E na veivale ni moce ni nodra tui.

³¹ Sa vosa ko koya, a sa lako mai na yavusa lago tani, Kei na kutu e na nodra veiyasana kecega.

³² Sa vakatauca na uca-cevata mei sosomi ni uca, Kei na yameyame ni bukawaqa e na nodra vanua.

³³ Sa yavita talega na nodra veivaivaini kei na vu ni lolo; Ka bolaraka na kau ni nodra vanua.

³⁴ Sa vosa, ka sa lako mai na vodre, Kei na nuve, era sa sega ni wili rawa,

³⁵ A ra sa kania kecega na co e na nodra vanua, Ka kania na vuata ni nodra vanua.

³⁶ Sa vakamatei ira kece talega ko koya na nodra ulumatua e na nodra vanua, Nai matai ni nodra kaukauwa kecega.

³⁷ A sa kauti ira yani na nona tamata a ra sa vakasiliva ka vakoula: Ka sa sega e dua e na nodra veimataqali sa malumalumu:

³⁸ Sa reki ko Ijipita ni ra sa lako tani: Ni sa kani ira na rerevaki ira.

³⁹ Sa tevuka ko koya e dua na o me nodra i vakaruru; Kei na bukawaqa me vakararamataki ira e na bogi.

⁴⁰ Era sa kerea, ka sa kauta mai ko koya na toa ni veikau, Ka sa vakamamautaki ira e na madrai ni lomalagi.

⁴¹ Sa vida na uluvatu ko koya, a sa vure maikina na wai; Sa dave e na vanua dravuisiga me vaka na uciwai.

⁴² Ni sa nanuma ko koya na nona veiyalayalati tabu, Kei Eparaama na nona tamata.

⁴³ A sa kauti ira yani na nona tamata ka ra sa reki, Io na nona digitaki ka ra sa marau;

⁴⁴ Sa solia vei ira na nodra vanua na veimatanitu: Ka ra sa taukena na nodra cakacaka na tamata;

⁴⁵ Me ra vakabauta kina na nonai vakaro, Ka kitaka tiko na nona vunau. Dou ia vei Jiova na vakavinavinaka.