NA SAME 104 - Vakavakadewa Makawa

Sa vakananuma na kaukauwa ni Kalou, 1-9, kei na nona lewa vinaka, 10-30. Ka sa vinakata me vakanananu tiko kina, 31-35.

¹ Mo vakavinavinaka vei Jiova, na yaloqu. I Jiova na noqu Kalou, o ni sa levu vakaidina; O ni sa vakaisulu e na vakarokoroko kei na ka vakaturaga.

² O ni sa vakaisulutaki kemuni e na rarama me vaka e nai sulu: O ni sa birika na lomalagi me vaka nai ubi levu:

³ O ni sa kotora nai kaso ni nomuni vale e cake e na dela ni wai: O ni sa cakava na o me nomuni qiqi vakaturaga: O ni sa lako voli e na taba ni cagi:

⁴ O ni sa cakava na nomuni agilose me ra vaka na cagi; Na nomuni talai me yameyame ni bukawaqa.

⁵ Sa vakataudeitaki vuravura ko koya e na kena yavu, Me kakua ni yavala rawa ka sega ni mudu.

⁶ O ni a ubia e na wai titobu me vaka e nai tutuvi: Sa cecere na wai ka lolovira na veiulu-ni-vanua.

⁷ Ni kemuni a vunauca sa dro na wai, E na domo ni nomuni kurukuru sa kusarawa ni lako tani:

⁸ Sa cabeta na veiulu-ni-vanua; sa lako sobu ki na veibuca Ki na yasana ko ni a cakava me nodra.

⁹ O ni a lesia na kenai yalayala me ra kakua ni sivia, Me ra kakua ni lesu tale me ubi vuravura.

¹⁰ Sa vakatubura ko koya na mata-ni-wai e na buca, Ka sa lako voli e na maliwa ni veiulu-ni-koro.

¹¹ Sa vagunuvi kina na manumanu kecega ni vanua; Sa ra gunu ka ra cegu na asa kila.

¹² Era sa tiko e na batina, na manumanu vuka, Ka ra sa tagi tiko e na taba ni kau.

¹³ Sa vagunuva na veiulu-ni-vanua ko koya mai na nona vale e cake: Sa vakamamautaki ko vuravura e na vua ni nomuni cakacaka.

¹⁴ Sa vakatubura ko koya na co me kedra na manumanu, Kei na co eso me yaga vei ira na tamata: Me vakatubura na kakana mai na qele;

¹⁵ Kei na waini, sa vakamarautaka na loma ni tamata, Kei na waiwai sa lumilumisa kina na matana, Kei na kakana sa kaukauwa kina na loma ni tamata.

¹⁶ Na kau sa bulia ko Jiova, sa mamau e na kedra dra: Io na sitari mai Lepanoni, sa tea ko koya;

¹⁷ Era vakasova kina na manumanu: Ia na belo, sa nona vale na damanu.

¹⁸ Na veiulu-ni-vanua cecere sa nodra i drodro na me kila; Kei na veiuluvatu me nodra i drodro na koni.

¹⁹ Sa lesia ko koya na vula mei vakatakilakila ni tabayabaki: Ka sa kila na kenai dromudromu na mata-ni-siga.

²⁰ O ni sa cakava na butobuto, ka sa bogi kina; Sa qai lako voli kina na manumanu kecega ni veikau:

²¹ Sa tagica na kedra kakana na luve ni laioni, Ka qara mai vua na Kalou na kedra kakana.

²² Sa cadra na mata-ni-siga, era sa qai soqoni vata, Ka la'ki koto e na nodra qara:

²³ Sa lako yani na tamata ki na nona cakacaka, Kei na ka e qarava, ka sa ia tiko me yakavi mada.

²⁴ I Jiova, sa ka levu vakaidina na nomuni cakacaka! Ka sa caka vakavuku kecega: Sa roboti vuravura na nomuni yau.

²⁵ Sa vakakina na wasawasa levu oqo sa rabailevu, Sa bula voli kina na ka e sega ni wili rawa, Na ka lalai kei na ka lelevu.

²⁶ Sa soko voli kina na waqa vanua: Na livaiacani talega, o koya ko ni a bulia me qito kina.

²⁷ Era sa vakanamata vei kemuni na ka kecega oqori, Mo ni solia na kedra e na kena gauna.

²⁸ A ka ko ni sa solia vei ira era sa rawata: O ni sa dedeka na ligamuni, ka ra sa mamau e na ka vinaka.

²⁹ O ni sa vunia na matamuni, era sa qai leqa: O ni sa kauta tani na nodra i cegu, era sa qai mate, Ka ra lesu tale me kuvu-ni-soso.

³⁰ O ni sa tala yani na Yalomuni, era sa buli: Io ko ni sa vakavoutaka tale na dela i vuravura.

³¹ Ena sega ni mudu rawa na lagilagi i Jiova: Ena rekitaka na nona cakacaka ko Jiova.

³² Sa raici vuravura ko koya, ka sa tavuki: Sa tara na veiulu-ni-vanua, ka sa kubou mai.

³³ Au na sere vei Jiova ni'u sa bula tiko: Au na vakavinavinaka vua na noqu Kalou e na noqu gauna sa vo tiko.

³⁴ Ena kamikamica na noqu vakanananu vua: Au na rekitaki Jiova.

³⁵ Me qeavu laivi e vuravura na daucaka cala, Io me kakua ni vo tiko nai valavala ca. Mo vakavinavinaka vei Jiova, na yaloqu. Dou ia vei Jiova na vakavinavinaka.