NA SAME 10 - Vakavakadewa Makawa

Na tamata yalododonu ni sa vakararawataki, sa masu vei Jiova, ka sa vakararavi vua.

¹ I Jiova, ko ni sa tu vakayawa e na vuku ni cava? Ko ni sa vunitaki kemuni e na veisiga ni rarawa e na vuku ni cava?

² Ni sa viavialevu na tamata ca sa vakacacani koya sa dravudravua; Mo ni lewa me ra vauci e na vere era sa bukia.

³ Sa dokai koya na tamata ca e na vuku ni gagadre ni yalona, Ka sa doka na daukocokoco, ia sa beci Jiova.

⁴ Ni sa viavialevu na matana na tamata ca, sa sega ni via vakasaqara na Kalou: Sa takali na Kalou e na ka kecega sa nanuma.

⁵ A ka ni dauveivakararawataki na nonai valavala e na veisiga kecega Na nomuni lewa sa yawasivita cake na ka sa raica na matana: Ia na nona meca kece sa vakasiusiutaka ko koya.

⁶ Sa kaya e lomana, Ka'u na sega sara ni vakayavalati; Ka'u na sega ni kunea na rarawa mai nai tabatamata e dua ka yacova nai tabatamata kadua.

⁷ Sa sinai na gusuna e na ruru kei na dauveivakaisini kei na lasu; Sa tu e ruku ni yamena na ca kei na veivakacacani.

⁸ Sa lawa koto e na veikoro lalai; E na yasana vuni sa labati ira era sa sega ni cala; Sa vakaraici ira lo na matana me vakacacana na malumalumu.

⁹ Sa tiko vakailawaki e na yasana vuni me vaka na laioni e na nona qara; Sa lawakitaki ira na malumalumu me vauci ira; Sa vauca dina na malumalumu ni sa coriti koya e na nona lawa.

¹⁰ Sa qai vakanovonovo ko koya ka sa cuva, Me bale e na nona kaukauwa na tamata malumalumu.

¹¹ Sa kaya e lomana, Sa guilecava ko koya na Kalou; Sa vunia na matana, ena sega sara ni raica.

¹² I Jiova, mo ni tu cake; ni dodoka yani na ligamuni, na Kalou; Ni kakua ni guilecavi ira era sa vakararawataki.

¹³ E na cava sa beci koya kina na Kalou na tamata ca? Sa kaya e lomana, Ko ni na sega ni taroga.

¹⁴ O ni a kunea ga; ko ni sa vakaraica na vakacaca kei na lomaca, me tara kenai sau: Sa laivi koya vei kemuni na malumalumu; Ko ni sa dauvukei koya na luveniyali.

¹⁵ Musuka na tabana na tamata lomaca kai valavala ca: Mo ni vakasaqara na nona ca me sa sega tale ni kune rawa.

¹⁶ A Tui ko Jiova ka sega ni mudu; Sa kawaboko mai na nona vanua na lewe ni veimatanitu.

¹⁷ I Jiova, ko ni a rogoca na nodra gagadre na malumalumu: Kemuni na vakataudeitaka na yalodra, ko ni na vakatu daliga me rogoca:

¹⁸ Me lewa na luveniyali kei koya sa vakararawataki; Me ra kakua tale ni ia na veivakasaurarataki ko ira na turaga kei vuravura.