Marika 8 - Vakavakadewa Makawa

Sa vakani ira na lewe vuqa ko Jisu e na kakana lailai, 19. Sa bureitaka nai vakatakilakila vei ira na Farisi, 1013. Sa vakavulici ira na nona tisaipeli me ra qarauni ira mai na nodrai vakavuvuli ca na Farisi kei nai tokani i Eroti, 1421. Sa vakabula e dua sa mataboko, 2226. Sa tukuni koya, 2733. A sa vakatakila nai balebale ni muri koya, 3438.

¹ Ena gauna ko ya ni ra sa lewe vuqa sara, ka sega na kedra, sa kacivi ira mai na nona tisaipeli ko Jisu, ka kaya vei ira,

² Au sa lomani ira na lewe vuqa, ni sa qai bogi tolu era sa tiko ga vei au, a sa sega na kedra;

³ ia kevaka kau vakatalai ira tani ki na nodra veivale ka ra sega mada ni kana, era na malumalumu e gau-ni-sala; ni sa so vei ira era sa lako vakayawa mai.

⁴ Sa qai kaya vua ko ira na nona tisaipeli, Ena rawa maivei na madrai me ra mamau kina ko ira e na lekutu oqo?

⁵ A sa tarogi ira ko koya, E vica nai buli madrai sa tu vei kemudou? A ra sa kaya, E vitu.

⁶ A sa kaya ko koya vei ira na lewe vuqa me ra tiko sobu e na qele; a sa taura nai buli madrai e vitu, ka vakavinavinaka, ka dovia, ka solia vei ira na tisaipeli me ra tauca e matadra; a ra sa tauca e matadra na lewe vuqa.

⁷ E vica talega na ika lalai sa tu vei ira; a sa lotutaka ko koya, ka kaya me ra tauca e matadra.

⁸ A ra sa kana, a ra sa mamau; a ra sa tomitomika na vo ni ka sa dovi, a sa vitu na sova sa sinai kina.

⁹ Ia ko ira era sa kana era sa lewe va beka na udolu: a sa qai vakatalai ira yani ko koya.

¹⁰ A sa vodoka sara na waqa ko koya kei ira vata kaya na nona tisaipeli, ka lako ki na yasayasa vaka-Talimanuca.

¹¹ A ra sa lako mai ko ira na Farisi, ka vakatekivu me ra veileti kaya, a ra sa taroga vua e dua nai vakatakilakila mai lomalagi, era vakatovolei koya.

¹² A sa vutugu sara ko koya e na vu ni yalona, ka kaya, A cava era sa vakasaqara kina e dua nai vakatakilakila ko ira nai tabatamata oqo? au sa kaya vakaidina vei kemudou, Ena sega sara ni soli e dua nai vakatakilakila ki nai tabatamata oqo.

¹³ A sa biuti ira, ka vodoka tale na waqa, ka lako yani ki tai kadua.

¹⁴ Ia era sa guilecava me ra kauta na madrai, a sa sega ga ni tu vei ira e na waqa, e dua bauga nai buli.

¹⁵ A sa vakarota vei ira ko koya, ka kaya, Dou raica, dou qarauni kemudou mai na nodra leveni na Farisi, kei na leveni nei Eroti.

¹⁶ A ra sa qai veivosakitaka vakai ira, ka kaya, Sa ka beka ni sa sega vei keda na madrai.

¹⁷ Ia ni sa kila ko Jisu, sa kaya vei ira, A cava dou sa veivosaki kina, ni sa sega vei kemudou na madrai? dou sa sega beka ni kila rawa, se vakasama? sa kaukauwa tiko beka na yalomudou?

¹⁸ dou sa vakamatana, ka sega beka ni rai rawa? ka vakadaligana, ka sega beka ni rogoca rawa? se dou sa sega beka ni nanuma?

¹⁹ Niu sa dovia nai buli madrai e lima vei ira na lewe lima na udolu, e vica nai su dou a vakatawa e na kena vo? A ra sa kaya, E tinikarua.

²⁰ Ia ni sa vitu vei ira na lewe va na udolu, e vica na sova dou a vakatawa e na kena vo? A ra sa kaya, E vitu.

²¹ A sa kaya vei ira ko koya, E vakaevei ni dou sa sega ni kila rawa?

²² A ra sa yaco ki Peciseita. A ra sa kauta mai vei koya e dua na mataboko, a ra sa masuti koya me tara.

²³ A sa taura na liga ni mataboko ko koya, ka tubera ki nai bili ni koro; ia ni sa qai kasivita na matana ruarua, ka tabaka e na ligana, sa taroga se sa raica e dua na ka se segai.

²⁴ A sa rai cake, ka kaya, Au sa raica na tamata era vaka na kau, ka ra sa lako voli.

²⁵ A sa tabaka tale na matana ko koya e na ligana, ka kaya, me rai cake: a sa qai vakabulai sara, a sa raica vakavinaka na ka kecega.

²⁶ A sa vakatalai koya ko koya ki na nona vale, ka kaya, Kakua ni ko lako tale ki na koro.

²⁷ A sa lako yani ko Jisu, kei ira na nona tisaipeli, ki na veikoro kei Sisaria-Filipai: a sa tarogi ira na nona tisaipeli e na gau-ni-sala, ka kaya vei ira, Era sa kaya na tamata se ko cei koi au?

²⁸ A ra sa kaya, Ko Joni na dauveipapitaiso: ia ka so, Ko Ilaija: ia ka so tale, E dua vei ira na parofita.

²⁹ A sa kaya vei ira, Ia dou sa kaya se ko cei koi au? Sa qai vosa ko Pita, ka kaya vua, Koi kemuni na Karisito.

³⁰ A sa vakaroti ira matua me ra kakua ni tukuni koya vua e dua.

³¹ A sa vakatekivu me vakavulici ira, ni sa kilikili kaya na Luve ni tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vunivola, ka me vakamatei, ka qai tucake-take e na i katolu ni siga.

³² A sa tukuna vakamacala na vosa ko ya ko koya. A sa kauti koya ko Pita, ka vakatekivu me vunauca.

³³ Ia ni sa vuki mai ko koya, ka vakaraici ira na nona tisaipeli, sa vunauci Pita, ka kaya, Lako tani ki dakuqu, Setani; ni ko sa sega ni vakananuma na ka ni Kalou, na ka ga ni tamata.

³⁴ Ia ni sa qai kacivi ira mai na lewe vuqa kei ira talega na nona tisaipeli, sa kaya vei ira, O koya yadua sa via muri au, me kakua ni muria na lomana, me colata ga na nona kauveilatai, ka muri au.

³⁵ Ia ko koya yadua sa via maroroya na nona bula, ena vakayalia; ia ko koya yadua ena vakayalia na nona bula e na vukuqu kei nai tukutuku-vinaka, ena maroroya.

³⁶ Ia ka cava na kena yaga vua na tamata, kevaka e rawati vuravura kece, ka vakayalia na yalona?

³⁷ se cava ena solia na tamata mei sau ni yalona?

³⁸ Ia ko koya ena maduataki au kei na noqu vosa e nai tabatamata oqo e dauyalewa ka ca; ena maduataki koya na Luve ni tamata, ni sa lako mai ko koya e nai ukuuku nei Tamana kei ira vata kaya na agilose yalosavasava.