Marika 5 - Vakavakadewa Makawa

Sa vakasevi ira na tevoro ko Jisu, a ra sa curuma na vuaka, 120. Sa vakabula na yalewa sa turidrabalavu, kei na goneyalewa sa ciba, 2143.

¹ A ra sa yaco ki tai kadua, ki na nodra vanua na kai Katara.

² Ia ni sa sobu mai waqa ko koya, sa sota sara kaya e dua na tamata mai na veibulubulu, sa curumi koya e dua na yalo velavela;

³ a sa dautiko e na veibulubulu ko koya; a sa sega e dua na tamata sa vesuka rawa, sa sega ga e na sinucodo:

⁴ ni sa vesu vakavuqa e nai vesu kei na sinucodo, a sa musulaka tani na sinucodo, a sa drutilaka nai vesu: a sa sega e dua sa vakamanoataka rawa.

⁵ A sa tiko vakadua, e na bogi kei na siga, e na veiulu-ni-vanua, kei na veibulubulu, a sa dauqoqolou, ka dautava na yagona e na veivatu.

⁶ Ia ni sa raici Jisu ni sa vakayawa tu, sa cici yani ka cuva vua,

⁷ a sa kaci e na domo levu, ka kaya, A cava vei kedaru, i Jisu na Luve ni Kalou cecere sara? au vakarota vei iko e na yaca ni Kalou, mo kakua ni vakararawataki au.

⁸ Ni sa kaya oti vua ko koya, Ko iko na yalo velavela, mo lako tani vua na tamata:

⁹ sa tarogi koya talega, Ko cei na yacamu? A sa vosa ko koya, ka kaya, A yacaqu ko Vavakoso, ni keimami sa lewe vuqa.

¹⁰ A sa masuti koya vakalevu ko koya, me kakua ni vakatalai ira tani e na vanua ko ya.

¹¹ A sa dua maikea na qele-ni-vuaka levu sa kana voli e baba ni ulu-ni-vanua.

¹² A ra sa masuti koya ko ira kecega na tevoro, ka kaya, Vakatalai keimami kivei ira na vuaka, me keimami curumi ira.

¹³ A sa vakatara ko Jisu. A ra sa qai lako tani na yalo velavela, ka curumi ira na vuaka: a ra sa cici sara na qele ni vuaka e na baba ki na wasawasa, era sa rua beka na udolu; a ra sa ora kina.

¹⁴ Ia ko ira sa vakani ira na vuaka era sa dro, ka laki tukuna e na koro kei na veiyasana ki vanua. A ra sa lako yani me ra raica na ka sa caka.

¹⁵ A ra sa yaco vei Jisu, ka raici koya ka curuma ko ira na tevoro, ko koya ka tu vua nai Vavakoso, ni sa qai tiko, ka vakaisulu, ka yalomatua: a ra sa rere.

¹⁶ Ia ko ira era raica, era sa tukuna vei ira na ka sa yaco vua ka curumi koya ko ira na tevoro, vei ira talega na vuaka.

¹⁷ A ra sa vakamasuti koya me lako tani e nodra vanua.

¹⁸ Ia ni sa vodo ki waqa ko koya, sa masuti koya ko koya ka curuma eliu ko ira na tevoro me mai tiko kaya.

¹⁹ A sa sega ni vinakata ko Jisu, ka sa kaya ga vua, Mo lako ki na nomudou, vei ira na wekamu, ka tukuna vei ira na levu ni veika sa cakava vei iko na Turaga, ka ni sa lomani iko.

²⁰ A sa lako ka sa tukuna voli mai Tikapoli na kena levu ni veika sa cakava vua ko Jisu: a ra sa kurabui kecega.

²¹ Ia ni sa lesu tale ko Jisu e na waqa ki tai kadua, era sa lewe vuqa sara sa soqoni vata vei koya: a sa tiko e matasawa ko koya.

²² Ka raica, sa lako mai e dua na turaga ni vale ni lotu, ko Jairo na yacana; ia ni sa raici koya, sa cuva sobu ki na yavana,

²³ a sa vakamasuta vakalevu, ka kaya, Na luvequ-yalewa lailai sa voleka sara ni mate: mo ni lako mai mo ni tabaki koya e na ligamuni, me vakabulai kina; ena qai bula ko koya.

²⁴ A sa lako vata kaya ko koya, a ra sa lewe vuqa sara sa muri koya, ka drigita.

²⁵ A sa dua na yalewa, sa turidrabalavu ka yabaki tinikarua,

²⁶ a sa levu na ka sa vosota vei ira na vuniwai era le vuqa, a sa vakayalia kina na nonai yau kecega, a sa sega ni bula, ia sa levu cake tiko na nona mate,

²⁷ ni sa rogoca nai tukutuku kei Jisu, sa lako vata mai kei ira na lewe vuqa, ki dakuna, ka tara na nonai sulu.

²⁸ Ni sa kaya ko koya, Kevaka kau na tara ga na nonai sulu, au na vakabulai.

²⁹ A sa mudu vakasauri nai davedave ni nona dra; a sa kila e na yagona sa bula mai na mate ca ko ya.

³⁰ A sa kila sara ko Jisu e lomana ni sa lako tani vua na kaukauwa, a sa vuki e na maliwa ni lewe vuqa, ka kaya, O cei sa tara na noqui sulu?

³¹ A ra sa kaya vua ko ira na nona tisaipeli, O ni sa raica era sa drigiti kemuni na lewe vuqa, ia ko ni sa taroga, O cei sa tarai au?

³² Sa qai rai voli yani ko koya, me kunei koya ka cakava na ka ko ya.

³³ A sa rere na yalewa, ka sautaninini, ni sa kila na ka sa caka vua, a sa lako mai ka cuva sobu e matana, ka tukuna kecega vua na kena dina.

³⁴ A sa kaya vua ko koya, Na luvequ-yalewa, sa vakabulai iko na nomu vakabauta; mo lako e na vakacegu, ka mo bula mai na nomu mate ca.

³⁵ Ni sa vosa tiko ko koya, sa lako mai eso mai na vale nei koya na turaga ni vale ni lotu, era kaya, Sa mate na luvemu-yalewa, ko sa vakaoca tale nai Vakavuvuli e na vuku ni cava?

³⁶ Ia ni sa rogoca ko Jisu na vosa era kaya, sa kaya sara vua na turaga ni vale ni lotu, Kakua ni yalo lailai, vakadinata ga.

³⁷ A sa sega ni laiva e dua me muri koya, ko iratou ga ko Pita, kei Jemesa, kei Joni na taci i Jemesa.

³⁸ A sa yaco ko koya ki na vale ni turaga ni vale ni lotu, a sa raica na nodra tagiyaso, era sa tagi ka qoqolou vakalevu.

³⁹ Ia ni sa curu ko koya, sa kaya vei ira, Dou sa tagiyaso ka tagi e na vuku ni cava? sa sega ni ciba na goneyalewa, sa moce ga.

⁴⁰ A ra sa dredrevaki koya. Ia ni sa vakatalai ira kece ki tautuba, sa kauti rau na tama ni goneyalewa kei na tinana, kei iratou sa tiko vata kaya, ka curu ki na tikina sa davo kina na goneyalewa.

⁴¹ A sa taura na liga ni goneyalewa ko koya, ka kaya vua, Talica kumi; a kenai balebale, Goneyalewa, au sa kaya vei iko, tu cake mai.

⁴² A sa tu cake sara na goneyalewa, ka lako voli; ni sa tinikarua na nona yabaki. A ra sa kurabui vakalevu sara.

⁴³ A sa vakarota matua vei ira ko koya, me kakua ni kila na ka oqo e dua na tamata: a sa kaya me soli vua na goneyalewa e dua na kena.