Marika 3 - Vakavakadewa Makawa

Sa vakabula ko Jisu e dua na tamata sa malai na ligana, kei ira e le vuqa sa tauvi-mate, 112. Sa digitaki ira nai apositolo, 1319. Eratou sa kaya na wekana ni sa lialia ko koya, 20,21. Sa vosa ko Jisu vei ira era sa beitaki koya e na nona vakasevi ira na tevoro, 2230. Sa tukuni ira era sa wekana dina, 3135.

¹ A sa curu tale ko koya ki na vale ni lotu; a sa tiko kina e dua na tamata sa malai na ligana.

² A ra sa vakaraici koya, se na vakabulai koya e na siga ni vakacecegu, se segai; me ra qai beitaki koya.

³ Sa qai kaya ko koya vua na tamata sa malai na ligana, Tu cake mai.

⁴ A sa tarogi ira, Sa tara beka me caka na ka vinaka e na siga ni vakacecegu, se me caka na ka ca? me ia na veivakabulai, se na veivakamatei? A ra sa galu ga.

⁵ Ia ni sa rai voli vakacudrucudru vei ira ko koya, ni sa rarawa na lomana e na vuku ni kaukauwa ni yalodra, sa kaya vua na tamata, Dodoka mai na ligamu. A sa dodoka yani: a sa vakabulai na ligana ka yaco me vaka na ligana kadua.

⁶ A ra sa lako yani na Farisi, ka bosei koya sara ko ira vata kei ira nai tokani i Eroti, se ra na vakamatei koya vakaevei.

⁷ A sa lako tani ko Jisu vaka ki wai kei ira vata kaya na nona tisaipeli: a ra sa lewe vuqa sara sa muri koya mai Kalili, kei Jutia,

⁸ mai Jerusalemi talega, kei Itumia, kei na tai kadua ni Joritani; ko ira talega e na veiyasana i Taia kei Saitoni, era lewe vuqa sara, ni ra sa rogoca na levu ni veika sa cakava ko koya, era sa lako mai vei koya.

⁹ A sa kaya ko koya vei ira na nona tisaipeli, me toka e dua na waqa lailai ko koya e na vukudra na lewe vuqa, de ra drigiti koya.

¹⁰ Ni ra sa lewe vuqa sa vakabula ko koya; a ra sa drigiti koya kina me ra tarai koya, ko ira kecega era sa tauvi-mate.

¹¹ O ira talega na yalo velavela, ni ra sa raici koya, era sa cuva sobu e matana, a ra sa qoqolou, ka kaya, O iko na Luve ni Kalou.

¹² A sa vakarota matua vei ira ko koya, me ra kakua ni tukuni koya.

¹³ A sa cabe ki na ulu-ni-vanua, ka kacivi ira mai sa digitaka: a ra sa lako mai vua.

¹⁴ A ra sa lewe tinikarua sa lesia ko koya, me ra tiko vata kaya, ka me vakatalai ira ko koya me ra vunau,

¹⁵ me tu talega vei ira na kaukauwa me ra vakasevi ira na tevoro:

¹⁶ A sa vakayacani Saimoni ko koya mei Pita:

¹⁷ kei Jemesa na luve i Sepete, kei Joni na taci i Jemesa, a sa vakayacani rau ko koya mei Poanaji, e kenai balebale, A luve ni kurukuru:

¹⁸ kei Adriu, kei Filipi, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni e dua vei ira sa vakatokai Na gumatua,

¹⁹ kei Jutasa Isikarioti, ko koya sa soli koya yani. A sa curu ko koya ki na dua na vale.

²⁰ A ra sa lewe vuqa sa soqoni vata tale, a ra sa sega kina ni kania rawa na kedra.

²¹ Ia ni ratou sa rogoca ko iratou na wekana, eratou sa lako mai me ratou tauri koya: ni ratou sa kaya, Sa lialia ko koya.

²² Ia ko ira na vunivola ka lako sobu mai Jerusalemi, era sa kaya, Sa tiko vua ko Pielisipupi, a sa vakasevi ira na tevoro e na kaukauwa ni nodra turaga na tevoro.

²³ A sa kacivi ira mai ko koya, ka kaya vei ira e na vosa vakatautauvata, E rawata vakaevei ko Setani me vakasevi Setani?

²⁴ Ia kevaka sa dua na matanitu sa veisei vakai koya, ena sega ni tu dei rawa na matanitu ko ya:

²⁵ ia kevaka sa dua na vale sa veisei vakai koya, ena sega ni tu dei rawa na vale ko ya.

²⁶ Ia kevaka sa ia ko Setani me veivala vakai koya, ka veisei, ena sega ni tu dei rawa, ena oti ga.

²⁷ Sa sega na tamata me curuma rawa na vale ni qaqa, ka kovea na nonai yaya, kevaka sa sega mada ni vesuka na qaqa, ena qai kovea emuri na nonai yau.

²⁸ Au sa kaya vakaidina vei kemudou, Sa rawa me bokoci laivi na nodrai valavala ca kecega na luve ni tamata, kei na nodra vosa ca kecega era sa vosavakacacataka kina na Kalou:

²⁹ ia ko koya sa vosavakacacataka na Yalo Tabu ena sega tikoga ni bokoci na nonai valavala ca, ia sa tu vua na nona cala ka tawa mudu:

³⁰ ni ra kaya, Sa dua na yalo velavela sa tu vua.

³¹ Sa qai lako mai ko iratou na tinana, kei na tacina, a ratou sa tu etautuba, ka talaki vua me lako mai.

³² Ia era sa lewe vuqa sa tiko vakavolivolita; ka ra sa kaya vua, Raica, na tinamu kei iratou na tacimu eratou sa tu etautuba, eratou mai qarai iko.

³³ A sa vosa vei ira, ka kaya, Ko cei na tinaqu se ko iratou na taciqu?

³⁴ A sa vakaraici ira era sa tiko vakavolivoliti koya, ka kaya, Raica na tinaqu kei ira na taciqu!

³⁵ ko koya yadua ena muria na loma ni Kalou, sai koya oqo na taciqu, se na ganequ, se na tinaqu.