Marika 2 - Vakavakadewa Makawa

Sa vakabula ko Jisu e dua na tamata sa tauvi-paralasi, 112. Sa kacivi Maciu me nona tisaipeli, a sa kana vata kei ira na tamata i valavala ca, 1317. Sa kaya ni sa sega ni cala ko ira na nona tisaipeli ni ra sa sega ni daulolo, 1822; se ni ra sa doloka na veisola ni sila e na siga ni vakacecegu, 2328.

¹ Sa bogi vica, sa qai curu tale ki Kapenaumi ko koya; a sa qai rogovaki ni sa tiko e vale.

² A ra sa lewe vuqa sa soqoni vata sara mai, a sa sega kina na tikina me rauti ira, e segai e na mata ni katuba: a sa vunautaka na vosa vei ira ko koya.

³ A sa lako mai vei koya eso, eratou kauta mai e dua sa tauvi-paralasi, sa colati koya e le va.

⁴ Ia ni ratou sa sega ni torovi koya rawa e na vukudra na lewe vuqa, eratou sa basuka na dela ni vale sa tiko kina ko koya: ia ni ratou sa basuka sara, eratou sa tukuca sobu nai mocemoce sa davo kina ko koya sa tauvi-paralasi.

⁵ Ia ni sa raica ko Jisu na nodratou vakabauta, sa kaya vua sa tauvi-paralasi, Na luvequ, sa bokoci na nomui valavala ca.

⁶ Ia ka so na vunivola era sa tiko kina, a ra sa veinanuyaka e lomadra, ka vakaoqo,

⁷ Sa vosavakacacataka na Kalou ko koya oqo e na vuku ni cava? ko cei tale sa bokoca rawa nai valavala ca, a Kalou duaduaga?

⁸ Sa kila sara e yalona ko Jisu ni ra sa veinanuyaka vakakoya e lomadra, ka sa kaya vei ira, A cava dou sa veinanuyaka kina na ka oqo e na lomamudou?

⁹ a cava vei rau e rawarawa cake, me kaya vua sa tauvi-paralasi, Sa bokoci na nomui valavala ca; se me kaya, Mo tu cake, ka kauta na nomui mocemoce, ka lako?

¹⁰ Ia mo dou kila kina ni sa rawata na Luve ni tamata e vuravura me bokoca nai valavala ca, (sa qai kaya ko koya vua sa tauvi-paralasi,)

¹¹ Au sa kaya vei iko, Mo tu cake, ka kauta na nomui mocemoce, ka lako ki na nomu vale.

¹² A sa tu cake sara ko koya, ka kauta nai mocemoce, ka lako yani e na matadra kecega; a ra sa kurabui kecega kina, ka vakarokorokotaka na Kalou, ka kaya, Eda sa sega ni raica eliu na ka e vakaoqo na kenai valavala.

¹³ A sa lako tale yani ko koya ki matasawa, a ra sa lako vei koya ko ira kecega na lewe vuqa, a sa vakavulici ira ko koya.

¹⁴ Ia ni sa lako voli yani, sa raici Livai na luve i Alifio sa tiko e na vale ni soli vakacavacava, a sa kaya vua, Muri au. A sa cavu tu ko koya, ka muri koya.

¹⁵ Ia ni sa tiko ko koya e na nona vale me kana, era sa lewe vuqa na kumuna nai vakacavacava kei na tamatai valavala ca era sa tiko me kana vata kei Jisu kei ira na nona tisaipeli: era sa lewe vuqa, a ra sa muri koya.

¹⁶ Ia ni ra sa raica ko ira na vunivola kei ira na Farisi ni sa kana vata ko koya kei ira sa kumuna nai vakacavacava kei ira na tamatai valavala ca, era sa kaya vei ira na nona tisaipeli. A cava sa kana vata ka gunu vata kina ko koya kei ira sa kumuna nai vakacavacava kei ira na tamatai valavala ca?

¹⁷ Ia ni sa rogoca ko Jisu, sa kaya vei ira, Sa sega ni yaga na vuniwai vei ira sa bula vinaka, vei ira ga sa tauvi-mate: au sa sega ni lako mai meu kacivi ira sa yalododonu, ko ira ga nai valavala ca, me ra veivutuni.

¹⁸ A ra sa daulolo ko ira na tisaipeli i Joni kei na nodra tisaipeli na Farisi: a ra sa lako mai ka kaya vua, A cava sa lolo kina ko ira na tisaipeli i Joni kei na nodra tisaipeli na Farisi, ia na nomu tisaipeli era sa sega ni lolo?

¹⁹ A sa kaya vei ira ko Jisu, Era sa lolo rawa li na weka ni tagane sa qai vakawati, ni sa tiko vata kei ira na tagane sa qai vakawati? ni sa tiko ga kei ira na tagane sa qai vakawati, era sa sega ni lolo rawa.

²⁰ Ia ena yaco mai na siga, ena kau tani kina vei ira na tagane sa qai vakawati; ka ra na qai lolo e na gauna ko ya.

²¹ Ia sa sega na tamata sa cula vata na tiki ni sulu vou kei nai sulu madra: ke sa vakakina, ena dresuka na kena madra na tikina vou sa botani kina, a sa kadresu vakalevu kina.

²² Sa sega talega na tamata sa vakataloca na waini vou ki na tavaya kuli-ni-manumanu madra; ke sa vakakina, ena vakacabotetaka na tavaya na waini vou, ka na dave yani na waini, ka rusa na tavaya; e vinaka ga me vakataloca na waini vou ki na tavaya vou.

²³ A sa lako ko koya e loma ni veiwere ni sila e na siga ni vakacecegu; ia ni ra sa lako voli na nona tisaipeli, era doloka na veisola ni sila.

²⁴ A sa kaya vua ko ira na Farisi, Raica, a cava era sa kitaka kina ko ira e na siga ni vakacecegu na ka e sega ni tara?

²⁵ Sa qai kaya vei ira ko koya, Dou sa sega beka ni wilika na ka sa kitaka ko Tevita, ni sa sega na kena, ka sa viakana, ko koya kei ira sa tiko vata kaya:

²⁶ Ni sa curu ko koya ki na vale ni Kalou, e na gauna i Epaiaca na bete levu, a sa kania na madrai dauraici, oqori sa sega ni tara me lau kana, sa tara duaduaga vei ira na bete, a sa solia talega vei ira era sa tiko vata kaya?

²⁷ Sa kaya talega vei ira, Sa caka na siga ni vakacecegu e na vukudra na tamata, e sega ni caka na tamata e na vuku ni siga ni vakacecegu:

²⁸ ia sa Turaga talega ni siga ni vakacecegu na Luve ni tamata.