Maika 7 - Vakavakadewa Makawa

Ko Maika, ni sa tagicaka na vanua, sa vakararavi vua na Kalou, 1-10. Sa vakacegui e na vosa ni yalayala eso, 11-17. Sa vakacaucautaka na loloma levu ni Kalou, 18-20.

¹ Isa koi au! ni'u sa vaka na tamata ni sa kumuni oti na vuata e na vula i katakata, ka vaka na tamata ni sa tomitomiki oti na vua-ni-vaini: sa sega nai soso vua ni vaini me'u kania: se na lolo taumada, ko ya sa gadreva tiko na yaloqu.

² Sa yali sara mai na vanua na tamata yalololoma: ia na tamata yalododonu sa sega ga vei ira na tamata: o ira kece era lawavaka ga na dra; era dui vakasava na wekana ki na lawa.

³ Me ra qacoya sara e na ligadra ruarua na nodra caka ca. Sa taroga ko koya sa turaga, kei koya talega na turaga ni lewa, na kedrau i sau; ia ko koya sa turaga levu cake sa tukuna sara na gagadre ca ni yalona: ka ra sa bukia vata vakakina.

⁴ O koya sa uasivi sara vei ira e na vinaka sa vaka ga na soni: o koya sa yalododonu sara vei ira sa bai wa-vakavotona: a kedra siga na nomu i vakatawa, io, na siga ni nomu cudruvi, sa toro mai; ena yaco ga oqo na nodra vakidroataki.

⁵ Kakua ni dou vakadinata e dua nai tokani, kakua ni vakararavi vua na wekamu dina: mo qarauna ga nai sogo ni gusumu mai vua sa koto e na lomaseremu.

⁶ Ni sa qai beci tamana na gonetagane, sa veimecaki koi rau na veitinani yalewa, kei rau na veivugoni yalewa; era sa nona meca na tamata ko ira na nona lewe ni vale.

⁷ Ia koi au, ka'u na rai ga vei Jiova; ka'u na waraki koya na Kalou, na noqu i vakabula: ena rogoci au na noqu Kalou.

⁸ Kakua ni ko reki, ko iko na noqu meca, ni'u sa ca: ke'u sa bale, ka'u na tu cake tale; ke'u sa tiko e na butobuto, ena noqu rarama ko Jiova.

⁹ Na cudru i Jiova ka'u na vosota ga, ni'u sai valavala ca vua, me na ia mada ko koya na veitotaki e na vukuqu, ka cudruvaki au: ena kauti au yani ki na rarama, au na raica na nona cakacaka dodonu.

¹⁰ Ena qai kunea ko koya sa noqu meca, ena luvu talega e na madua ko koya ka kaya vei au, Sa evei ko Jiova na nomu Kalou? ena raici koya na mataqu: ena qai buturaki sobu ko koya me vaka na lolobo e na saqata.

¹¹ A siga ena viri tale kina na nomu bai, e na siga ko ya ena vakayawataki na kenai loku.

¹² E na siga ko ya ena lako mai vei iko ko ira mai Asiria ka yacovi Ijipita, mai Ijipita talega ka yacova na Uciwai, mai na wasawasa e dua ki na wasawasa tani, mai na ulu-ni-vanua e dua ki na ulu-ni-vanua tani.

¹³ Ia na vanua, ena lala sara ga e na vukudra era tiko kina, sa kenai sau ni nodra i valavala.

¹⁴ Mo ni vakatawai ira na nomuni tamata e na nomuni titoko, io, na qele ni sipi sa nomuni votavota, ka sa tiko duaduaga mai na veikau, e na loma i Kameli: me ra kana voli tale mai Pasani kei Kiliati, me vaka e na gauna eliu.

¹⁵ Me vaka e na gauna dou a lako mai kina mai na vanua ko Ijipita, ka'u na vakatakila vei ira na ka e veivakurabuitaki.

¹⁶ Ena raica ko ira na veimatanitu, ka ra na maduataka kece na nodra kaukauwa: era na tabonaka na gusudra e na ligadra, ena didivara mai na daligadra.

¹⁷ Era na dramica na kuvu-ni-soso me vaka na gata, me vaka na ka sa qasi voli e na vanua era na lako ninini mai na nodra qara vuni: era na rerevaki Jiova na noda Kalou, io, era na rere talega e na vukumudou.

¹⁸ O cei na Kalou me tautauvata kei kemuni, ka bokoca na caka cala, ka sa buluta na nodra talaidredre na kena vo ni nonai votavota? ka sa sega ni cudru tiko me sega ni mudu, ni sa vinakata ko koya me yalololoma.

¹⁹ Ena mai lomani keda tale ko koya; ena butuka sobu na noda caka cala; io, ko ni na biuta ki na wasa titobu na nodra i valavala ca kecega.

²⁰ O na vakayacora na ka dina vei Jekope, kei na yalololoma vei Eparaama, na ka ko a bubului kina vei ira na neimami qase mai na gauna eliu.