Maika 5 - Vakavakadewa Makawa

Sa sucu na Mesaia, ka sa tukuni na nona matanitu, 1-15.

¹ Dou soqoni vakamataivalu mada, ko iko na goneyalewa vakamataivalu! sa buku na druadrua ni noda koro! era sa yavita kina na baluna na turaga ni lewa ni Isireli e nai titoko.

² Ia ko iko, Pecileema Efiraca, ko sa lailai dina vei ira na lewe udolu e Juta, ia maivei iko ena lako mai vei au ko koya ena lewai ira na Isireli; na nona lako mai sa ka mailiu sara, mai na gauna makawa dina.

³ Ia ena soli ira yani ko koya, me yaco mada na gauna me vakasucu kina ko koya sa taratara: ia ko ira na kena vo ni tacina ena qai lesu kivei ira na Isireli.

⁴ Ia ena tu ko koya, ka vakani ira e na kaukauwa i Jiova, e na yaca vakaturaga i Jiova na nona Kalou; ka ra na tikotiko ga; ni na qai levu ko koya ka yaco ki nai yalayala kei vuravura.

⁵ O koya talega oqo ena vu ni sautu. Ia ni sa mai curuma na noda vanua na kai Asiria, ka butuka na noda veivale vakaturaga, eda na qai vakatura cake me veivala kaya e lewe vitu nai vakatawa, io, e lewe walu na tamata turaga.

⁶ Ka ra na vakacacana na vanua ko Asiria e nai seleiwau, io, na vanua i Nimiroti e na kenai yalayala: ena qai vakabulai keda ko koya mai vei ira na kai Asiria, ni ra sa mai curuma na noda vanua, ni ra sa mai butuka talega na nodai yalayala.

⁷ Ia na kena vo vei ira na Jekope era na tiko e na kedra maliwa na veimataqali e vuqa me vaka na tegu maivei Jiova, me vaka na uca ka tau ki na co, ka sa sega ni vakarorogo vua na tamata, se waraki ira na luve ni tamata.

⁸ Ia na kena vo vei ira na Jekope era na tiko e na kedra maliwa na veimatanitu, e na kedra maliwa na veimataqali e vuqa, me vaka na laioni e na kedra maliwa na manumanu ni veikau, me vaka na luve ni laioni e na loma ni qele ni sipi: o koya ke sa lako yani kina, sa na butuka sobu, ka basuraka, ka sega e dua me na vakabula.

⁹ Ena dulaki na ligamu vei ira na nomu meca, ia ko ira kece era cati iko era na muduki laivi.

¹⁰ Ia ena yaco e na siga ko ya, sa kaya ko Jiova, au na muduka tani na nomu ose; ka vakarusa na nomu qiqi-ni-valu:

¹¹ au na muduka laivi na veikoro e na nomu vanua, ka talaraka sobu kecega na nomu veikoro ni valu:

¹² au na vakaotia tani talega na veinocati mai na ligamu: ia ena sega tale vei iko ko ira era parofisai vakailasu:

¹³ au na muduka tani talega vei iko na nomu matakau ceuceu, kei na nomu matakau e vakaduri tu; ia ko na sega ni sorova tale na cakacaka ni ligamu:

¹⁴ au na cavuta tani talega na nomu matakau i Aseteroci: ka vakarusa na nomu veikoro.

¹⁵ Ia ka'u na ia e na cudru kei na lesa na veisausaumi ki na veimatanitu, sa sega ni vakarorogo.