Maika 4 - Vakavakadewa Makawa

A matanitu vinaka ni Mesaia, 1-13.

¹ Ia ena yaco e na gauna maimuri, ena vakataudeitaki na ulu-ni-vanua ni vale i Jiova me sivia na veiulu-ni-vanua, ena vueti me cecere ka lolovira na veiulu-ni-koro; a ra na drodro kina na veimataqali.

² A ra na lako kina na veimatanitu e vuqa, ka kaya, Me da mai lako cake ki na ulu-ni-vanua i Jiova, io ki na vale ni Kalou i Jekope; ena vakavulica vei keda ko koya na nonai valavala, ia eda na muria na nona sala: ni na rogo yani mai Saioni na vunau, kei na vosa i Jiova mai Jerusalemi.

³ Ia ena ia na veilewai e na vukudra na veimataqali e vuqa, kei na veivunauci e na vuku ni veimatanitu kaukauwa e tu vakayawa; ka ra na tukitukia na nodra i seleiwau mei bati ni siviyara, kei na nodra moto mei sele ni samaki: ena sega ni lavei seleiwau e dua na matanitu ki na matanitu tani, a ra na sega tale ni vulica nai valu.

⁴ A ra na dui tiko ga na tamata yadua e na ruku ni nona vaini, kei na ruku ni nona lolo; ka sega e dua me na vakarerei ira: ni sa kaya na gusu i Jiova ni lewe vuqa.

⁵ Io, ko ira kece na veimataqali era na dui muria na yaca ni nodra kalou, ia koi keda, eda na muria ga na yaca i Jiova na noda Kalou ka sega ni mudu ka sega ni mudu.

⁶ E na siga ko ya, sa kaya ko Jiova, au na vakasoqoni ira era sa lokiloki, kei ira era sa vakasavi tani, kei ira ka'u a vakararawataka;

⁷ ia ka'u na cakavi ira era sa lokiloki me kena vo, kei ira era sa vakasavi tani vakayawa me matanitu kaukauwa: ia ena lewai ira tikoga ko Jiova e na ulu-ni-vanua ko Saioni, mai na gauna oqo, io, ka sega ni mudu.

⁸ Ia ko iko, na nodra vale-cecere na qele ni sipi, na nona koro ni valu na goneyalewa ni Saioni, ena yaco kina vei iko, io, na lewa eliu, ena yaco tale na matanitu ni goneyalewa ni Jerusalemi.

⁹ A cava tale ko sa tagi vakadomoilevu kina? sa sega li na nomu tui? ko ira na nomu daubose era sa yali beka? ka ni sa tauvi iko na rarawa me vaka na yalewa sa taratara?

¹⁰ Mo yaluma mada, mo vakasucu, ko iko na goneyalewa ni Saioni, me vaka na yalewa sa taratara: ni ko na qai lako tani e na koro, ia ko na la'ki tiko mai vanua, io, ko na yaco sara ki Papiloni; ia ko na vakabulai kina; io, ena vakabulai iko talega maikea ko Jiova, mai na ligadra na nomu meca.

¹¹ Ia oqo era sa soqoni vakaivalu vei iko ko ira na veimatanitu e vuqa, era kaya, Me vakacacani ko koya; me raici Saioni mada na matada.

¹² Ia ko ira, era sa sega ni kila na ka sa nanuma kina ko Jiova, ka sega talega ni vakasamataka na nona lewa: ni na kumuni ira mai ko koya me vaka nai vau sila ki na rara ni sila.

¹³ Mo tu cake ka butuka, o iko na goneyalewa ni Saioni: ia na nomu i leu ka'u na cakava me aironi, kei na nomu ququ ka'u na cakava me parasa: ia ko na butuqaqia na veimataqali e vuqa: ia ka'u na vakacabora vei Jiova na nodra i toki ni valu, kei na nodra i yau vua na Turaga kei vuravura taucoko.