Maika 3 - Vakavakadewa Makawa

A nodra i valavala vakasausa na turaga, 1-4, kei na nodra dauvosa lasu na parofita, 5-8, kei na nodra tiko vakacegu kecega, 9-12.

¹ Ia ka'u a kaya, Dou vakarorogo mada, koi kemudou na turaga i Jekope, kei kemudou na mataveilewai ni mataqali i Isireli; Sa sega beka ni kilikili kei kemudou mo dou kila na lewa dodonu?

² Oi kemudou sa cata na ka vinaka ka vinakata na ka ca; ka vocia tani vei ira na kulidra, kei na lewedra mai na suidra;

³ io, era sa kania na lewedra na noqu tamata, ka vocia tani vei ira na kulidra; kei na suidra era sa musulaka, ka tatalaka, me vaka na lewe ni kuro, ka vaka na lewe ni manumanu e na loma ni kuro levu.

⁴ Era na qai tagi vei Jiova, ia ena sega ni rogoci ira ko koya: io, ena tabonaka na matana maivei ira e na gauna ko ya, ni sa ca na nodra i valavala.

⁵ Sa kaya vakaoqo ko Jiova e na vukudra na parofita era vakacalai ira na noqu tamata, ka ra katia e na batidra, ka kacivaka, Na vakacegu; ia ko koya sa sega ni solia na kakana ki na gusudra, era sa vakarau me ra vala kaya.

⁶ O koya oqo ena yacovi kemudou kina na bogi ka na sega na raivotu; ia ena butobuto vei kemudou ka na sega ni ia na caka mana vakailasu; io, ena dromu na mata-ni-siga vei ira na parofita, ena siga butobuto ga vei ira.

⁷ Era na qai madua na rairai, ka taqaya na daucaka-mana vakailasu: io, era na tabonaka na tebenigusudra kecega: ni sa sega na ka e tukuna mai ko koya na Kalou.

⁸ Ia e dina ni'u sa sinai e na kaukauwa maivei koya na Yalo i Jiova, e na lewa dodonu talega, kei na yalodei, me'u tukuna rawa vei ira na Jekope na nodra talaidredre, vei ira talega na Isireli na nodra i valavala ca.

⁹ Dou rogoca mada na ka oqo, oi kemudou na turaga ni mataqali i Jekope, kei kemudou na mataveilewai ni mataqali i Isireli, koi kemudou sa cata na lewa dodonu, ka kauta vakatani na ka dodonu kecega;

¹⁰ era sa tarai Saioni e na dra, kei Jerusalemi e na caka cala;

¹¹ o ira na nodra turaga era sa ia na veilewai me ra vakaisolisoli kina, kei ira na nodra bete era sa ia nai vakavuvuli me ra vakaivoli kina, kei ira na nodra parofita era sa ia na caka mana vakailasu me ra vakailavo kina: ia era na vakararavi ga vei Jiova, ka kaya, Sa sega li ni tiko vata kei keda ko Jiova? ena sega ni yacovi keda e dua na ca.

¹² O koya oqo ena cukiti kina ko Saioni me vaka na were e na vukumudou, ia ko Jerusalemi ena yaco me bukebuke walega, kei na ulu-ni-vanua ni vale tabu ena vaka na veitikina cecere ni veikau.