Maika 2 - Vakavakadewa Makawa

Sa vunauca na nodra i valavala kaukauwa, 1,2. Sa tukuna tale na cudru ni Kalou vei ira, 3-5. Sa vunauca na nodra cata na vunau ni Kalou, 6-11. Sa tukuna na vosa ni yalayala ni Kalou vei ira na Jekope era sa vo tiko, 12,13.

¹ E ca vei ira sa nakita me ra caka cala, ka bukia na ka ca e na nodra i mocemoce! ka ni sa kida na mataka era sa qai cakava, ni sa rawata na ligadra.

² A ra kocova na veiwere, ka kovea; kei na veivale, ka taura: a ra sa vakacacana na tamata kei na nona mataqali, io, na tamata kei na ka e taukena.

³ O koya oqo sa kaya kina ko Jiova; Raica, au sa bukia na kedra ca na mataqali oqo, dou na sega ni kauta rawa maikina na domomudou; dou na sega talega ni lako voli vakaviavialevu: ni sa gauna ca oqo.

⁴ E na siga ko ya ena taurivaki na kemudoui bole, ka lelevaki kemudou e na lele vakaloloma, ka vaka, Eda sa vakacacani vakaidina: a nodra i votavota na kai noqu sa volitaka ko koya: sa kauta tani vei au ko koya! sa vota kina ko koya na noda veiwere vua na dauvuki.

⁵ O koya oqo ena sega kina ni vo vei iko e dua me viri dali e na vakawiri madigi e nai soqosoqo i Jiova.

⁶ Dou kakua ni ia na parofisai; me ra ia ga na parofisai ko ira era sega ni parofisaitaka na ka vakaoqo: Sa sega ni mudu na veivakamaduataki.

⁷ Dou sa kaya li na mataqali i Jekope! Sa vakalekalekataki beka na Yalo i Jiova? Sa vakaoqo beka na nona cakacaka? Sa sega beka ni yaga na noqu vosa vei koya sa lako vakadodonu?

⁸ Ia oqo era sa tu cake ko ira na noqu tamata me vaka na meca: ai tutuvi kei nai sulu dou sa kauta tani maivei ira era lako vinaka voli mai, io, vei ira era cata nai valu.

⁹ Dou a vakasevi ira tani na watidra na noqu tamata mai na nodra veivale; dou a kauta tani na noqu ka vakaiukuuku maivei ira na luvedra, me sega tale vei ira ka tawa mudu.

¹⁰ Dou cavu tu, ka lako tani; ni sa sega ni nomudou i vakavakacegu oqo: ni sa vakadukadukalitaki, ena vakarusai kemudou, io, e na veivakarusai rarawa.

¹¹ Ke sa dua na tamata, sa lako voli e na yalo daulasu, me na vosa lasu ka kaya, Au na parofisaitaka vei iko na waini kei na yaqona kaukauwa; sai koya ga me sa nodra parofita na tamata oqo.

¹² Au na vakasoqoni kemudou vakaidina kece sara ga, na Jekope; au na soqoni ira dina vata na kena vo ni Isireli; au na vakatikori ira vata me vaka na sipi ni Posira, me vaka na qele ni sipi e loma ni vanua veico: era na ue vakalevu e na vuku ni tamata.

¹³ Sa liutaki ira cake ko koya sa daubasubasuka: era na basuka yani, ka lako yani ki na matamata-ni-koro, ka curu yani kina: ia ena liutaki ira ko koya na nodra tui, io, ko Jiova ena nodra i liuliu.