Maika 1 - Vakavakadewa Makawa

Sa tukuna ko Maika na cudru ni Kalou vei ira na kai Samaria kei na kai Jerusalemi, e na vuku ni nodra qarava na kalou lasu, 1-7. Era na cudruvi kece sara kina na lewe ni vanua, 8-16.

¹ A vosa i Jiova sa yaco vei Maika na kai Moreseci e na gauna i Jocame, kei Easi, kei Esekaia, eratou tui Juta, ka sa raica ko koya ka baleti Samaria kei Jerusalemi.

² Oi kemudou na veimataqali kecega dou rogoca; ka mo vakarorogo, na vuravura, kei na ka kecega sa tu kina: ia me vakadinadina ki na nomudou ca na Turaga ko Jiova, io na Turaga, mai na nona vale tabu.

³ Ia dou raica, sa lako mai na nona yasana ko Jiova, io, ena lako sobu mai ko koya, ka butuka na veiyasana cecere kei vuravura.

⁴ Ena waicala talega na veiulu-ni-vanua e rukuna, ia na veibuca ena wase rua, me vaka na drega ni vola e na mata ni bukawaqa, ka vaka na savu ni wai mai na ulu ni vanua.

⁵ Sa yaco na ka kecega oqo ni sa talaidredre ko Jekope, io, e na vuku ni nodra i valavala ca na mataqali i Isireli. A cava na nodra talaidredre na Jekope? ko Samaria, se segai? a cava talega na nodra veiyasana cecere na Juta? ko Jerusalemi, se segai?

⁶ O koya oqo ka'u na kitaki Samaria kina me sa vaka e dua nai binibini e loma ni were, kei nai teitei e na were-ni-vaini: ia ka'u na sovabiuta na kena veivatu ki na buca, ka vakavotuya na kena yavu.

⁷ Ia na kena matakau kecega ena vorolaki, kei na nonai solisoli kecega ena vakamai e na bukawaqa, kei na kena matakau kecega ka'u na vakacacana: ni sa kumuna mai nai solisoli ni nona dautagane, ka mei solisoli talega ni dautagane ena suka tale kina.

⁸ O koya oqo ka'u na tagi kina, ka qoqolou, au na lako voli ni ka'u sa vakacacani ka luvawale: au na tagi me vaka na koli kila, ka tagi yaso me vaka na ositereji.

⁹ Ni sa sega ni vakabulai rawa na nona mavoa; ni sa tauvi Juta talega; sa yaco sara ko koya na meca ki na nodra matamata-ni-koro na noqu tamata, io, ki Jerusalemi.

¹⁰ Dou kakua ni tukuna mai Kaca; dou kakua sara ni tagi: mo qiqi voli e na kuvu-ni-soso mai Peci-afira.

¹¹ Mo lako voli yani, na kai Sefiri, ka luvawale tu ka madua; sa sega ni lako yani ko ira na kai Seenani; na kena tagi ka ia mai Peci-eseli, sa takali tani kina vei kemudou na tiko dei.

¹² E dina era sa tagica na vinaka na kai Maroci; ia na ca sa lako sobu maivei Jiova ki na matamata-ni-koro ko Jerusalemi.

¹³ Mo vauca na qiqi-ni-tamata ki na manumanu totolo, ko iko na kai Lakisi: sa vakavuna ko koya nai valavala ca ni goneyalewa ni Saioni, ni sa kune vei iko na nodra talaidredre na Isireli.

¹⁴ O koya oqo ko na solia kina nai vola ni tawase ki Moreseci-kaca: na veimataqali mai Ekisipi era na lasutaki ira na tui Isireli.

¹⁵ Ia ko koya talega sa na kemui taukei ka'u na kauta mai vei iko, na kai Maresa: na nodra lagilagi na Isireli ena yaco ki Etulama.

¹⁶ Mo koti mada, ka me tasi na ulumu e na vukudra na nomu gone ni toko; mo vakalevutaka na nomu ulu cou me vaka na ikeli; ni ra sa kau vakabobula tani vei iko.